Parisdə minlərlə insan irqçiliyə və ifrat sağçılığa etiraz edib
Paris, 22 iyun, AZƏRTAC
Fransanın paytaxtı Parisdə minlərlə insan irqçilik və ifrat sağçı ideyalara qarşı keçirilən yürüşdə iştirak edib. Aksiya Sen-Deni şəhərinin merinin, “Əyilməz Fransa” partiyasının (LFI) üzvü Balli Baqayokonun çağırışı ilə təşkil olunub.
AZƏRTAC xəbər verir ki, nümayişçilər “Barbes” metrostansiyasının yaxınlığında toplaşaraq, Respublika meydanına doğru yürüş ediblər. Parisdə qırmızı səviyyəli istilik xəbərdarlığının qüvvədə olmasına və havanın temperaturunun 35 dərəcəyə yaxınlaşmasına baxmayaraq, nümayişçilər üzərində antifaşist şüarlar yazılmış plakatlarla, eləcə də Fransa və Fələstin bayraqları ilə küçələrə çıxıblar.
Yürüşün başlanğıcında çıxış edən Balli Baqayoko bildirib ki, irqçilik və ayrı-seçkilik öz-özünə geriləmir. İnsanlar susduqda və göz yumduqda bu hallar daha da güclənir.
Aksiyada “Əyilməz Fransa” partiyasının tanınmış simaları - deputatlar Rima Hassan, Manuel Bompard, Matild Panot və partiyanın lideri Jan-Lük Melenşon da iştirak ediblər. Polis zorakılığına qarşı fəaliyyəti ilə tanınan Assa Traore də yürüşə qoşulub.
Tədbirdən sonra Balli Baqayoko sosial şəbəkədə iştirakçılara təşəkkür edərək, isti hava şəraitinə baxmayaraq, göstərilən həmrəyliyi yüksək qiymətləndirib. O, vətəndaşları 2027-ci ilə qədər respublika dəyərlərinin gücləndirilməsi naminə fəal olmağa çağırıb.
Jan-Lük Melenşon isə irqçiliklə mübarizənin gələcək seçkilərdə mühüm mövzulardan birinə çevrilməli olduğunu vurğulayaraq, “Antiirqçilik səs vermək üçün bir səbəbə çevrilməlidir. 2027-ci ildə görüşənədək!” yazıb.
Qeyd edək ki, yürüş bu ilin mart ayında “CNews” telekanalında Balli Baqayokoya qarşı səsləndirilən irqçi xarakterli açıqlamalardan sonra təşkil olunub. Həmin hadisədən sonra Paris Prokurorluğu mənşə, milliyyət, irqçilik və ya dinə görə ictimai təhqir, eləcə də kibertəqib maddələri üzrə araşdırmalara başlayıb.
Son illərdə sosial şəbəkələrdə və televiziya proqramlarında oxşar hadisələrin artması Fransada irqçilik, etnik mənsubiyyət və dini ayrı-seçkilik mövzusunu yenidən gündəmə gətirib.
Bölmənin digər xəbərləri
