Pedaqoji Universitet tələbələrin akademik və sosial rifahını dəstəkləyir
Bakı, 14 avqust, AZƏRTAC
Azərbaycan Dövlət Pedaqoji Universitetində (ADPU) tələbələrin akademik göstəricilərinin və nailiyyətlərinin dəstəklənməsi məqsədilə geniş təqaüd və təhsil imkanları yaradılıb.
ADPU-dan AZƏRTAC-a bildirilib ki, semestr imtahanlarının nəticələrinə əsasən universitet və fakültələr üzrə ən yüksək nəticə göstərən tələbələr əlavə adlı təqaüd almaq imkanı əldə edirlər. Universitetdə ümumilikdə 14 adlı təqaüdün mövcudluğu tələbələrin akademik göstəricilərini yüksəltməsinə əlavə stimul yaradır. Bununla yanaşı, yüksək nəticə göstərən abituriyentlər üçün dövlət sifarişi əsasında 70 faizə qədər ödənişsiz təhsil imkanları təqdim olunur. Bu imkan ali təhsil almaq istəyən gənclər üçün mühüm üstünlük hesab olunur. ADPU sosial həssas qruplara aid qız tələbələrin yaşayış məsələlərinin həllinə də dəstək göstərir. Belə tələbələr təhsil müddətində yataqxana ilə təmin olunmaq imkanından faydalana bilirlər.
Tələbələr üçün beynəlxalq təcrübə imkanları da genişləndirilir. Xarici universitetlərlə əməkdaşlıq çərçivəsində mübadilə proqramlarında iştirak, müxtəlif ölkələrin təhsil mühiti ilə tanışlıq və ikili diplom əldə etmək imkanları tələbələrin beynəlxalq akademik təcrübəsinin artırılmasına şərait yaradır.
Bütün bu imkanlar tələbələrin yalnız akademik göstəricilərinin deyil, sosial rifahının, beynəlxalq təcrübəsinin və karyera perspektivlərinin dəstəklənməsinə yönəlib.
Bölmənin digər xəbərləri
