Pentaqon Kaliforniyadakı hərbi bazasının bir hissəsini icarəyə verə bilər
Bakı, 4 sentyabr, AZƏRTAC
ABŞ Müdafiə Nazirliyi “Qızıl günbəz” raketdən müdafiə sisteminin maliyyələşdirilməsi məqsədilə “Camp Pendleton” hərbi bazasının bəzi ərazilərini kommersiya istifadəsi üçün icarəyə verməyi nəzərdən keçirir.
AZƏRTAC xəbər verir ki, NBC telekanalının məlumatına görə, hazırda Kaliforniya ştatında yerləşən Dəniz Piyadaları Korpusuna məxsus bazanın müəyyən sahələrinin icarəyə verilməsi ilə bağlı Pentaqonda müzakirələr gedir. Bu, yeni raketdən müdafiə sistemi olan “Qızıl günbəz” layihəsinə əlavə maliyyə vəsaitinin cəlb olunması ilə bağlıdır.
Baza ərazisinin cəmi dörddəbir hissəsi hazır olsa da, dəniz piyadaları təlimlər zamanı istifadəyə verilməmiş ərazilərdə müxtəlif manevrlər həyata keçirirlər.
Xatırladaq ki, bu ilin may ayında ABŞ Prezidenti Donald Tramp “Qızıl günbəz” adlı yeni raketdən müdafiə sisteminin memarlıq konsepsiyasının seçildiyini bəyan edib. Dövlət başçısının sözlərinə görə, layihənin dəyəri təxminən 175 milyard dollardır. Trampın ikinci prezidentlik müddətinin sonunadək istifadəyə verilməsi planlaşdırılan yeni sistemə yerüstü, dəniz və kosmik komponentlər daxil olacaq.
CNN telekanalının məlumatına görə, “Qızıl günbəz” sisteminin ilk genişmiqyaslı sınağı 2028-ci ilin sonuna nəzərdə tutulub.
Bölmənin digər xəbərləri
