Pentaqon UNO ilə bağlı son hesabatını təqdim edib
Bakı, 9 mart, AZƏRTAC
Pentaqonun naməlum uçan obyektlərlə (UNO) bağlı son hesabatında deyilir ki, İkinci Dünya müharibəsinin sonundan bəri ABŞ hökumətinin apardığı araşdırmalarda yerdənkənar texnologiyaya dair heç bir dəlil tapılmayıb və tədqiqat qrupu müşahidələrin əksəriyyətinin səhv müəyyən edilmiş adi obyekt və hadisələr olduğu qənaətinə gəlib.
AZƏRTAC CNN telekanalına istinadla xəbər verir ki, sözügedən hesabat 2022-ci ildə Pentaqonun o zaman yeni yaradılmış Domen Anomaliyalarının Həlli Ofisinin (AARO) yadplanetlilərin Yer kürəsinə gəldiyini və ya buraya qəza enişi etdiyini göstərən heç bir dəlil tapmadığını elan etməsindən sonra təqdim olunub.
ABŞ-ın 2023-cü il Milli Müdafiə Səlahiyyəti Qanununa əsasən, AARO Konqresə 1945-ci ildən bəri “naməlum anormal hadisələr” (UAP) ilə bağlı hökumətlərin tarixi qeydlərini təfərrüatlı şəkildə əks etdirən hesabat təqdim etməli idi. Pentaqonun mətbuat katibi general-mayor Pat Rider ikicildlik sənədin birincisini keçən həftə Konqresə təqdim edib. Hesabatın xülasəsində deyilir: “AARO hər hansı UNO tədqiqatının, akademik səviyyədə maliyyələşdirilən araşdırmanın və ya rəsmi araşdırma qrupunun UNO ilə bağlı heç bir sübutunu tapmadı. Bir çox UAP hesabatları həll edilməmiş və ya naməlum olaraq qalsa da, AARO onların əksəriyyətini adi obyektlər və ya hadisələr kimi müəyyən edə bilər”.
Hesabatda deyilir ki, 1945-ci ildən bəri hökumət UNO-ların uçuş təhlükəsizliyi riski, rəqib ölkələrin texnoloji sıçrayışları və ya “ağıllı nəzarət altında dünyadan kənar texnologiya” sübutunu təmsil edib-etmədiyini müəyyən etmək üçün araşdırmaları maliyyələşdirib. İctimaiyyət arasında hökumətin və ya onun daxilindəki gizli bir təşkilatın bir neçə “dünyadan kənar kosmik gəmi və yerdənkənar bioloji qalıqları” bərpa etməsi və bərpa edilmiş texnologiyanın “əks mühəndisliyi” üçün proqramlar həyata keçirməsi barədə davamlı bir hekayə yayılır.
Pentaqonun sözçüsü vurğulayıb: “AARO bir çox insanın bu versiyaları səmimi şəkildə qəbul etdiyini bilir. Bu hesabatın məqsədi hər hansı bir hekayənin sübutu və ya təkzibi deyil, ABŞ-ın maliyyələşdirdiyi keçmiş UNO araşdırma səylərini araşdırmaq üçün ciddi analitik və elmi yanaşmadan istifadə etməkdir”.
AARO bu günə qədər təqdim edilən bütün məlumatlara əsaslanaraq müəyyən edib ki, yerdənkənar texnologiyanın tərs mühəndisliyi ilə əlaqəli xüsusi insanlar, məlum yerlər, texnoloji testlər və sənədlərlə bağlı iddialar qeyri-dəqiqdir”.
ABŞ ordusu onilliklər ərzində UNO və “uçan boşqablar” üzrə müşahidələrini davam etdirib. Pentaqon iki il əvvəl bildirib ki, onun araşdırma səyləri yüzlərlə yeni hesabata səbəb olub, lakin ağıllı yadplanetli həyatına işarə edən heç bir sübut yoxdur.
Bölmənin digər xəbərləri
