Perunun sabiq prezidenti Martin Viskarra azadlığa buraxılıb
Bakı, 4 sentyabr, AZƏRTAC
Peru Ali Məhkəməsinin Apelyasiya Palatası korrupsiya işi üzrə təhqiqat çərçivəsində müvəqqəti həbs edilən ölkənin sabiq prezidenti Martin Viskarra Kornehonun azadlığa buraxılması ilə bağlı qərar qəbul edib.
AZƏRTAC xəbər verir ki, qərar Peru məhkəməsinin sosial media hesabında açıqlanıb.
Qeyd edək ki, avqust ayında aşağı instansiya məhkəməsi sabiq dövlət başçısına qarşı beş aylıq həbs qərarı çıxarıb. Ali Məhkəmə isə həmin qərarın verilməsi zamanı prokurorluğun müraciətinə baxılarkən prosessual pozuntulara yol verildiyini bildirib.
İstintaq məlumatına görə, Martin Viskarra 2011–2014-cü illərdə Mokequa departamentinin qubernatoru vəzifəsində çalışdığı dövrdə müxtəlif layihələrin həyata keçirilməsi ilə bağlı tenderlərdə iştirak edən şirkətlərdən rüşvət alıb. Perunun Baş prokurorluğu ona qarşı 15 il müddətinə azadlıqdan məhrumetmə cəzası istəyir. Sabiq prezident isə özünə qarşı irəli sürülən ittihamları rədd edir.
Martin Viskarra 2018-ci ilin mart ayında Prezident Pedro Pablo Kuçinskinin istefasından sonra ölkə başçısı vəzifəsini icra etməyə başlayıb. 2020-ci ilin noyabrında Peru parlamenti onun vəzifədən kənarlaşdırılması barədə qərar qəbul edib.
Bölmənin digər xəbərləri
