Peskov: Kremldə Putin-Tramp görüşünə dair heç bir aydınlıq yoxdur
Bakı, 26 fevral, AZƏRTAC
Kremldə Rusiya Prezidenti Vladimir Putinlə ABŞ Prezidenti Donald Trampın şəxsi görüşü ilə bağlı hələlik heç bir aydınlıq yoxdur.
AZƏRTAC xəbər verir ki, bunu Rusiya Prezidentinin mətbuat katibi Dmitri Peskov jurnalistlərə bildirib. O, Putinlə Tramp arasında yeni telefon danışığının planlaşdırılıb-planlaşdırılmadığı və onların şəxsi görüşünə hazırlıqların başlanıb-başlanılmaması ilə bağlı sualı cavablandırarkən deyib: “Şəxsi görüşlə bağlı hələlik heç bir aydınlıq yoxdur”.
Peskovun sözlərinə görə, Vladimir Putinlə Donald Tramp arasında yeni telefon danışığı da planlaşdırılmır.
Xatırladaq ki, fevralın 18-də Ər-Riyadda yüksəksəviyyəli Rusiya-ABŞ danışıqları baş tutub. Rusiyanın xarici işlər naziri Sergey Lavrov bildirib ki, uzun müddət ərzində ilk üz-üzə danışıqlar zamanı Rusiya ilə ABŞ arasında əməkdaşlığın tam bərpası və onun qarşılıqlı maraq doğuran yeni sahələrdə genişlənməsi üçün şərait yaradılması barədə razılığa gəlinib. Həmçinin Ukraynadakı böhranın mümkün qədər tez həlli üzərində işə başlamaq üçün yüksək səviyyəli işçi qrupları yaratmaq barədə də razılıq əldə olunub.
Bölmənin digər xəbərləri
