Politoloq : Ərdoğanın rəhbərliyi ilə Türkiyə dünyadakı proseslərdə önəmli güc sahibinə çevrilib
Bakı, 29 aprel, Ramiz Quliyev, AZƏRTAC
Azərbaycanla Türkiyənin tarixi qardaşlığı mövcuddur. Bu illər ərzində iki dost və qardaş dövlətin münasibətlərinin bu səviyyəyə çatmasında hər iki ölkə liderinin tarixi xidmətləri böyükdür.
Bu fikirləri AZƏRTAC-a müsahibəsində Sosial Tədqiqatlar Mərkəzinin (STM) sektor müdiri, politoloq Tural İsmayılov deyib.
Politoloq qeyd edib ki, İstanbulda keçirilən “TEKNOFEST” aerokosmik və texnologiya festivalında Azərbaycan və Türkiyə prezidentlərinin iştirakı iki dövlətin hər zaman bir yerdə olduğunu bir daha göstərdi.
Festivalda çıxış edən Prezident İlham Əliyev Türkiyənin böyük Türk dünyasının birləşməsində mühüm rol oynadığını və bu prosesdə Rəcəb Tayyib Ərdoğanın tarixi xidmətlərini xüsusi qeyd edib.
Sosial Tədqiqatlar Mərkəzinin nümayəndəsi bildirib ki, bu gün Türkiyə müdafiə sənayesi sahəsində dünya liderlərindən biridir. Türkiyənin istehsal etdiyi pilotsuz uçuş aparatları dünyanın ən güclü ordularında uğurla tətbiq edilir. Dost ölkənin bu uğurları sayəsində bu gün dünya bazarında “Bayraktar”lara, “Kızılelma”lara çox böyük maraq var. Həmçinin nəzərə almaq lazımdır ki, Türkiyənin bu gün regional gücdən qlobal gücə çevrilməyi birmənalı şəkildə Türkiyə Prezidenti Rəcəb Tayyib Ərdoğanın uğurlu liderliyinin davamıdır.
Onun sözlərinə görə, məhz Ərdoğanın rəhbərliyi ilə Türkiyə dünyadakı proseslərdə önəmli güc sahibinə çevrilib. Həmçinin Ərdoğanın iqtidarı dövründə Türkiyənin mövqeləri daha da güclənib. Türkiyə beynəlxalq səviyyədə tarixi ədalətin bərpa edilməsində məqsədyönlü tədbirlər görərək, dünyadakı sülh prosesinə ciddi töhfə verir və bu, Prezident Rəcəb Tayyib Ərdoğanın uğurudur: “Ona görə də dünyada Türkiyə Prezidentinin siyasi obrazına qarşı böyük bir rəğbət var. Həmçinin hesab edirəm ki, “Bayraktar” PUA-larının Azərbaycan Ordusunda uğurlu tətbiqindən sonra və həmçinin “Baykar” şirkətinin rəhbəri Selçuk Bayraktarın Azərbaycana tez-tez səfərlər etməsi və Prezident İlham Əliyevin Azərbaycanda Bayraktar Mərkəzinin açılması ilə bağlı mesajı tarixi əhəmiyyətə malikdir. Çünki Azərbaycan Türkiyənin istehsal etdiyi PUA-ları uğurla tətbiq edən ölkədir”.
T.İsmayılov vurğulayıb ki, Qarabağ müharibəsində “Bayraktar”ın uğurundan bu gün bütün dünya danışır. Bu baxımdan, Azərbaycanda Bayraktar Mərkəzinin yaradılmağı çox vacib əhəmiyyətə malikdir. Eyni zamanda, bu gün “Kızılelma”lar dünyanın marağı olduğu istehsal sahələrindən biridir. Yaxın zamanlarda “Kızılelma”nın NATO ölkələrinin ən inkişaf etmiş ordularında yer alacağı bəllidir. Artıq “Kızılelma” ilə bağlı Türkiyəyə sifarişlər verilib və təbii ki, qardaş ölkə olaraq Azərbaycan Ordusuna ilk sırada “Kızılelma”lar veriləcək. Prezident İlham Əliyev Türkiyədə açıqlamasında Azərbaycanın “Kızılelma” əldə edəcəyini söyləyərək, həm də çox vacib mesaj verdi.
Müsahibim diqqətə çatdırıb ki, məhz Ərdoğanın rəhbərliyi sayəsində Türkiyə son illərdə yüksək texnologiya sahəsində böyük nailiyyətlər əldə edib. Bu gün Türkiyə kosmik dövlətə çevrilib və yaxın gələcəkdə qardaş ölkənin Azərbaycan əsilli ilk kosmonavtı səmaya çıxacaq: “Hesab edirəm ki, Türkiyənin kosmik tədqiqatlar, müdafiə sənayesi, İKT sənayesində atdığı addımlar Türkiyənin qabaqcıl ölkələrdən birinə çevirəcək. Bu yaxınlarda Türkiyənin ilk milli hibrid avtomobili “Togg”un istehsalı da məhz Ərdoğanın hakimiyyəti dövrünə təsadüf edir və bütün bunlar bizim üçün çox sevindiricidir. Azərbaycanın ən böyük tarixi müttəfiqi və qardaşı olan Türkiyənin inkişafı və hərbi qüdrətinin artması Azərbaycan-Türkiyə münasibətlərini də növbəti pilləyə daşıyır”.
Bölmənin digər xəbərləri
