Polşa ərazisinə yenə 10-dan çox hava şarı uçub
Bakı, 10 aprel, AZƏRTAC
Polşa ərazisinə 10-dan çox qaçaqmalçılıq şarları daxil olub. Polis vətəndaşları şübhəli bağlamalara toxunmamağa və dərhal məlumat verməyə çağırır.
AZƏRTAC xəbər verir ki, RMF FM radiosu qaçaqmalçılıq şarlarının Varmin-Mazur voyevodluğunda Elk, Gijitsko və Bartoşitse şəhərləri yaxınlığında göründüyünü bildirib. “Yerli polis Oleçko yaxınlığında oxşar obyektlərin peyda olması haqqında da bildirib”, - deyə “Gazeta.pl” xəbər portalı yazır.
Polis şübhəli bağlamaları, xüsusən də yükü olan şarları görən insanları onlara yaxınlaşmamağa və toxunmamağa çağırır. Hazırda bütün şarların yerə düşüb-düşmədiyi barədə heç bir məlumat yoxdur. Mövcud məlumatlar göstərir ki, şarlara qanunsuz gətirilən siqaretlər olan qara bağlamalar yapışdırılıb.
RMF FM-in məlumatına görə, hər bir belə şar adətən GPS qəbuledicisi ilə təchiz olunub. Bu, qaçaqmalçılıq malları toplayanlara onun düşmə yerini müəyyən etməyə imkan verir. Polis hazırda bu işi araşdırır.
Bölmənin digər xəbərləri
