Populyar “Dubay şokoladı” qlobal miqyasda yaşıl püstə defisiti yaradıb
Bakı, 21 aprel, AZƏRTAC
“TikTok” platformasında məhsullarının təşviqi indi ABŞ və İranın geniş kənd təsərrüfatı iqtisadiyyatlarına təsir edəcək qədər güclüdür. AZƏRTAC xarici mediaya istinadla xəbər verir ki, bu, ən azından söhbət dəbdəbəli qənnadı məmulatlarının istehlakından getdikdə aktual hal alır.
Kremli yaşıl püstə içliyi olan şokolad çubuğu sosial şəbəkələrdə yayımlanan bir sıra videolardan sonra inanılmaz dərəcədə populyarlaşıb. Bahalı “Dubay şokoladının” dadını tərifləyən ilk video 2023-cü ilin sonlarında təqdim edilib və indi bir çox sonrakı videoları nəzərə almasaq, 120 milyon dəfədən çox baxılıb.
Bunun nəticəsində daha çox ABŞ və ya İranda yetişdirilən püstənin qlobal miqyasda çatışmazlığı baş verib. Fındıq ticarəti ilə məşğul olan “CG Hacking”in sahibi Cayls Heykinq bildirib ki, qiymətlər bir ildə 7,65 dollardan 10,30 dollara qalxıb.
Dünyanın aparıcı ixracatçısı olan ABŞ-da keçən il məhsuldarlığın az olması səbəbindən artıq püstə qıtlığı yaranıb. Bu məhsul digərlərindən daha yüksəkkeyfiyyətli idi və buna görə də bütöv qoz-fındıq kimi, hələ də qabıqda satılırdı. Bu, şokolad plitələrində istifadə olunan əsas ləpələrin kəskin qıtlığına səbəb olub.
İran istehsalçıları altı ay müddətində - mart ayına qədər BƏƏ-yə əvvəlki 12 ay ilə müqayisədə 40 faiz çox qoz-fındıq ixrac ediblər.
Dubayın şokolad çılğınlığı südlü şokolad, “qədaif” kimi tanınan xırdalanmış xəmir və püstə kremli içliyi birləşdirən ləziz məhsulun yaradılması ilə daha da artıb. “Emirati chocolatier Fix” firması tərəfindən hazırlanmış və yalnız BƏƏ-də satılan bu məhsul ənənəvi ərəb desertinə istinad edərək “Can't Get Knafeh of It” adlanır.
“Läderach” və “Lindt” kimi digər aparıcı şokolad istehsalçıları tez bir zamanda öz püstə şokolad məhsullarını yaratdılar, lakin indi onlar beynəlxalq tələbatı ödəməkdə çətinlik çəkirlər.
Bəzi mağazalar bir anda sata biləcəyi şokolad məhsullarının sayını məhdudlaşdırıb. Bu, ya “TikTok”un gücünə, ya da ləzzətli şokoladın daha köklü cazibəsinə sübutdur.
Bölmənin digər xəbərləri
