Portuqaliya və Koreya Respublikası yığmaları mundialın pley-off mərhələsində
Bakı, 2 dekabr, AZƏRTAC
Futbol üzrə Portuqaliya və Koreya Respublikası milli komandaları Qətərdə keçirilən dünya çempionatının pley-off mərhələsinə yüksəlib.
AZƏRTAC xəbər verir ki, turnirin H qrupunun üçüncü turu çərçivəsində Portuqaliya və Koreya Respublikası yığmaları üz-üzə gəliblər. “Edukeyşn Siti” stadionunda təşkil olunan matç koreyalı futbolçuların 2:1 hesablı qələbəsi ilə yekunlaşıb. Koreya Respublikası seçməsinin heyətində 27-ci dəqiqədə Kim Yunq Qvon, 91-ci dəqiqədə Xvan Xi Çxan, rəqib komandadan isə 5-ci dəqiqədə Rikardo Orta fərqləniblər.
Qrupun digər matçında Qana və Uruqvay yığmaları qarşılaşıblar. “Əl Canub” stadionunda oynanılan matçda Uruqvay seçməsi iki cavabsız qolla qalib gəlib - 2:0. Yığmanın heyətində Corcian de Arraskaeta dubl edib. Qollar matçın 26-cı və 32-ci dəqiqələrində vurulub.
Portuqaliya 6 xalla qrup lideri kimi mərhələ adlayıb. Hesabında 4 xal olan Koreya Respublikası millisi əlavə göstəricilərə görə pley-offa yüksəlib. Uruqvay yığması 4 xalla üçüncü, Qana millisi isə 3 xalla dördüncü olub.
G qrupu çərçivəsində Kamerun-Braziliya və Serbiya-İsveçrə oyunları keçiriləcək. “Lusail” stadionunda oynanılacaq Kamerun-Braziliya matçını ABŞ-dan olan FIFA referisi İsmail Elfat idarə edəcək. “Stadium 974”də keçiriləcək digər matç isə Fernando Rapalliniyə (Argentina) həvalə olunub. Hər iki oyun Bakı vaxtı ilə saat 23:00-da başlayacaq.
Qeyd edək ki, Portuqaliya, Braziliya, Niderland, Seneqal, İngiltərə, ABŞ, Fransa, Avstraliya, Argentina, Polşa, Mərakeş, Xorvatiya, Yaponiya və İspaniya yığmaları səkkizdəbir finala vəsiqəni təmin ediblər.
Bölmənin digər xəbərləri
