Prezident: Azərbaycan öz enerji təhlükəsizliyini təmin edib
Bakı, 23 mart, AZƏRTAC
Azərbaycan Prezidenti İlham Əliyev Novruz bayramı münasibətilə Bakıda keçirilmiş ümumxalq şənliyindəki nitqində bu gün enerji təhlükəsizliyinin milli təhlükəsizlik qədər önəmli olduğunu söyləyib. Dövlətimizin başçısı bildirib ki, heç bir ölkə öz milli təhlükəsizliyini enerji təhlükəsizliyini təmin etmədən sığortalaya bilməz. Azərbaycan öz enerji təhlükəsizliyini təmin edib. Prezident bildirib: “Görün, Azərbaycan qazı bu gün Avropa üçün, Avrasiya üçün, bu bölgə üçün nə qədər böyük əhəmiyyət daşıyır. Yəni, yeni enerji xəritəsi yaradılır. Bunu biz yaradırıq, öz tərəfdaşlarımızla birlikdə. Ona görə təbii ki, görülən işlər Azərbaycanın geosiyasi əhəmiyyətini artıracaq və bizim gücümüzü də artıracaq, təsir imkanlarımız da artacaq”. Azərbaycanın bu gün də kifayət qədər güclü olduğunu vurğulayan dövlətimizin başçısı deyib ki, hazırda bölgədə nə iqtisadi, nə siyasi, nə başqa sahələrdə heç bir layihə bizim razılığımız olmadan icra edilə bilməz. Bunu yaxın tarix göstərib.
Bölmənin digər xəbərləri
