Prezident Ərdoğan: İrana qarşı hərbi əməliyyat regionda gərginliyi və qeyri-müəyyənliyi artıracaq
Ankara, 18 fevral, AZƏRTAC
İran ilə ABŞ arasındakı problemlər dialoq yolu ilə həll edilməlidir. Ankara hər iki ölkə ilə ən yüksək səviyyədə dialoq aparmağa davam edir.
AZƏRTAC xəbər verir ki, Türkiyə Prezidenti Rəcəb Tayyib Ərdoğan bu açıqlamanı Efiopiyaya səfərində onu müşayiət edən jurnalistlərə verib.
O, İran və ABŞ prezidentləri ilə son telefon danışıqları zamanı vəziyyətin həlli üçün atıla biləcək addımların müzakirə olunduğunu bildirib.
“Türkiyə bu gün maneələr yaradan və ziddiyyətləri şiddətləndirən ölkə deyil, sülhməramlı dövlət qismində çıxış edir”, - deyə Ərdoğan vurğulayıb.
Türkiyə lideri qeyd edib ki, İranla yeni müharibə heç bir tərəfə fayda verməyəcək. “Əksinə, bütün region uduzan tərəf olacaq. Ankara sülh prosesinin təməlini qoyur və sülhün tərəfdarıdır”, - deyə o əmin edib. Dövlət başçısının sözlərinə görə, Ankara öz mövqeyini bütün tərəflərə çatdırıb: “Biz İrana hərbi müdaxilənin əleyhinəyik. Belə bir ssenari regionda gərginliyin artması və daha da böyük qeyri-müəyyənlik demək olardı. Diplomatik vasitələr mövcud olduğu müddətcə ümid də var”.
Türkiyə Prezidenti əlavə edib ki, Ankara sülh ümidinin yaşamasını təmin etmək üçün əlindən gələni etməyə davam edəcək.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
