Prezident İlham Əliyevin səfəri Azərbaycan–Almaniya münasibətlərinin inkişafına yeni strateji impuls verdi - ŞƏRH
Bakı, 22 iyul, AZƏRTAC
Azərbaycan ilə Almaniya arasında siyasi, iqtisadi və humanitar əlaqələr qarşılıqlı etimada, bərabərhüquqlu tərəfdaşlığa və ortaq maraqlara əsaslanaraq dinamik şəkildə inkişaf edir. Azərbaycan Prezidenti İlham Əliyevin Almaniya Federativ Respublikasına son rəsmi səfəri isə ikitərəfli münasibətlərin yeni mərhələyə qədəm qoymasını şərtləndirən mühüm siyasi hadisə kimi dəyərləndirilə bilər. Səfər çərçivəsində keçirilən yüksəksəviyyəli görüşlər, aparılan geniş müzakirələr və əldə olunan razılaşmalar gələcək əməkdaşlığın perspektivlərini daha da genişləndirib.
Bu fikirləri AZƏRTAC-a açıqlaması zamanı Milli Məclisin deputatı Aydın Hüseynov bildirib.
Deputat qeyd edib ki, Azərbaycan ilə Almaniya arasında formalaşmış yüksəksəviyyəli siyasi dialoq uzun illərdir ardıcıl şəkildə davam edir və bu münasibətlər qarşılıqlı etimad əsasında daha da möhkəmlənir.
“Prezident İlham Əliyevin Almaniyaya son səfəri iki ölkə arasında siyasi əlaqələrin intensivləşməsi, iqtisadi əməkdaşlığın genişlənməsi və yeni strateji istiqamətlərin müəyyənləşdirilməsi baxımından xüsusi əhəmiyyət daşıyır: “Almaniya Avropa İttifaqının aparıcı iqtisadiyyatlarından biri olmaqla yanaşı, Azərbaycanın Avropadakı mühüm ticarət və investisiya tərəfdaşları sırasında yer alır. Qarşılıqlı ticarət dövriyyəsinin artırılması, sənaye kooperasiyası, yüksək texnologiyalar, rəqəmsal iqtisadiyyat, nəqliyyat-logistika, kənd təsərrüfatı, yaşıl enerji və innovasiya sahələrində əməkdaşlığın daha da genişləndirilməsi üçün böyük potensial mövcuddur. Azərbaycanın son illərdə həyata keçirdiyi genişmiqyaslı iqtisadi islahatlar, əlverişli investisiya mühiti və beynəlxalq nəqliyyat dəhlizlərinin inkişafı Almaniya şirkətlərinin ölkəmizə marağını artırır. Xüsusilə Orta Dəhlizin artan strateji əhəmiyyəti, Bakı Beynəlxalq Dəniz Ticarət Limanının imkanları və müasir logistika infrastrukturu Avropa ilə Asiya arasında yükdaşımaların genişlənməsində Azərbaycanın rolunu daha da gücləndirib”, - deyə Aydın Hüseynov vurğulayıb.
Deputatın sözlərinə görə, Prezident İlham Əliyevin Almaniyaya son rəsmi səfəri zamanı iqtisadi əməkdaşlığın dərinləşdirilməsi, qarşılıqlı investisiyaların təşviqi, biznes dairələri arasında əlaqələrin genişləndirilməsi və yeni birgə layihələrin həyata keçirilməsi əsas müzakirə mövzularından olub: “Bu isə yaxın perspektivdə iki ölkə arasında iqtisadi münasibətlərin daha sürətlə inkişaf edəcəyini göstərir. Azərbaycan bu gün Avropanın enerji təhlükəsizliyinin təmin edilməsində etibarlı tərəfdaş kimi mühüm rol oynayır. Təbii qaz ixracı ilə yanaşı, ölkəmiz bərpaolunan enerji sahəsində də geniş layihələr həyata keçirir. Almaniyanın yaşıl iqtisadiyyat və innovativ texnologiyalar sahəsində zəngin təcrübəsi bu istiqamətdə əməkdaşlığın daha da genişlənməsi üçün əlverişli imkanlar yaradır. Azərbaycanın həyata keçirdiyi enerji siyasəti Avropanın enerji təhlükəsizliyinə mühüm töhfə verir. Eyni zamanda, yaşıl enerji sahəsində əməkdaşlığın genişləndirilməsi hər iki ölkənin uzunmüddətli strateji maraqlarına tam uyğundur. Bununla yanaşı, elm, təhsil, mədəniyyət və humanitar sahələrdə əlaqələrin inkişafı xalqlarımız arasında dostluq münasibətlərini daha da möhkəmləndirəcək”.
A.Hüseynov əlavə edib ki, Prezident İlham Əliyevin praqmatik, uzaqgörən və milli maraqlara söykənən xarici siyasəti nəticəsində Azərbaycanın beynəlxalq nüfuzu davamlı olaraq yüksəlir. Ölkəmiz həm regional, həm də qlobal miqyasda etibarlı tərəfdaş kimi qəbul olunur və bu amil Avropa dövlətləri ilə münasibətlərin daha da inkişafına əlverişli zəmin yaradır.
Deputatın fikrincə, Almaniyaya son rəsmi səfər yalnız ikitərəfli münasibətlərin inkişafı baxımından deyil, həm də Azərbaycanın Avropa ilə əməkdaşlığının yeni mərhələyə qədəm qoymasının bariz göstəricisidir. Bu səfər siyasi dialoqun dərinləşməsinə, iqtisadi əlaqələrin genişlənməsinə, qarşılıqlı investisiyaların artmasına və strateji tərəfdaşlığın daha da möhkəmlənməsinə mühüm töhfə verəcək.
Bölmənin digər xəbərləri
