ELM VƏ TƏHSİL
Prezident İlham Əliyev və Azərbaycan məktəbinin intibah dövrü
![Prezident İlham Əliyev və Azərbaycan məktəbinin intibah dövrü](/files/2023/3/1200x630/1698319920625856733_1200x630.jpg)
Bakı, 26 oktyabr, AZƏRTAC
“Təhsil millətin gələcəyidir!” - bu müdrik kəlam Azərbaycan xalqının Ümummilli Lideri, 100 illik yubileyini böyük coşqu ilə qeyd etdiyimiz Heydər Əliyevə məxsusdur. Onun Azərbaycana rəhbərlik etdiyi hər iki dövrdə, - istər sovetlər dönəmində, istərsə də müstəqillik illərində təhsilin, elm və mədəniyyətin inkişafı ən çox diqqət mərkəzində olan sahələrdən olub. Ulu Öndər Heydər Əliyevin siyasi kursunun layiqli davamçısı, Prezident İlham Əliyevin ölkəmizə rəhbərlik etdiyi 20 il ərzində də respublikada təhsilin inkişafı prioritet kimi daim diqqət mərkəzində saxlanılıb. Bu gün Müzəffər Ali Baş Komandan İlham Əliyevin rəhbərliyi ilə ərazi bütövlüyü və suverenliyimizi bərpa etməyimizdə fədakar müəllim əməyinin də müstəsna rolu var.
Bu fikirləri AZƏRTAC-a açıqlamasında Azərbaycan Dövlət Pedaqoji Universitetinin tədris işləri üzrə prorektoru dosent Eldar Aslanov söyləyib.
Prorektor qeyd edib ki, Prezident İlham Əliyev hakimiyyətə gəldiyi ilk gündən etibarən Azərbaycan iqtisadiyyatını, regionların sosial-iqtisadi potensialının artırılmasını, vətəndaşların sosial rifahını və ordu quruculuğunu inkişaf etdirməklə yanaşı, təhsilin inkişafı ilə bağlı mövcud strategiyanı yüksələn xətlə inkişaf etdirməyə başladı. 2003-cü ildən etibarən paytaxtda və regionlarda ümumilikdə 3630 məktəb tikilib və ya əsaslı təmir edilib.
E.Aslanov hələ 2005-ci ildən başlayaraq ümumtəhsil məktəblərinin informasiya və kommunikasiya texnologiyaları ilə təminatı proqramının icra olunduğunu xatırladıb: “Nəticədə məktəblərin kompüterlərlə təmini və internet şəbəkəsinə qoşulmasında xeyli irəliləyiş əldə olundu. Bu proses son illərdə bütün dünyanı sınağa çəkən pandemiya fonunda distant təhsilin nə dərəcədə əhəmiyyət kəsb etməsi, eyni zamanda, müasir informasiya əsrinin tələbləri baxımından öz aktuallığını bir daha göstərdi”.
Prorektor bildirib ki, ötən 20 il ərzində ümumtəhsil məktəblərində maddi-texniki bazanın və təhsil infrastrukturunun yenilənməsi ilə yanaşı, ümumi təhsilin hüquqi bazasının yenilənməsi və möhkəmləndirilməsi, məzmun və metodika baxımından yenilənməsi, müəllimlərin texnoloji biliklərinin artırılması, sosial rifahlarının yaxşılaşdırılması istiqamətində də ardıcıl iş aparılır. 1999-cu ildə Ümummilli Lider Heydər Əliyev tərəfindən təsdiq edilmiş “Azərbaycan Respublikasının təhsil sahəsində İslahat Proqramı”na müvafiq olaraq 2006-cı ildə “Azərbaycan Respublikasında ümumi təhsilin konsepsiyası (Milli Kurikulum)” çərçivə sənədi qəbul edildi. Bundan sonra isə müxtəlif fənlər üzrə yeni təhsil proqramlarının - kurikulumların hazırlanmasına start verildi. 2009-cu ildə qəbul olunan “Təhsil haqqında” Qanun və “Azərbaycan Respublikasının ümumi təhsil sistemində Qiymətləndirmə Konsepsiyası” isə ümumtəhsil müəssisələrində tədrisin və qiymətləndirmənin yeni yanaşmalar əsasında təşkil olunmasına zəmin yaratdı. Bu baxımdan 2013-cü ildə qəbul edilən “Azərbaycan Respublikasında təhsilin inkişafı üzrə Dövlət Strategiyası” müstəsna əhəmiyyət kəsb edir. Strategiyaya əsasən, təhsil sisteminin qarşısında duran əsas strateji hədəflər müəyyənləşdirildi. Bundan sonra ölkədə səriştəyə əsaslanan şəxsiyyətyönümlü təhsilin inkişaf etdirilməsinə başlanıldı, eyni zamanda, inklüziv təhsilin tətbiqinə, o cümlədən məktəbəqədər təhsil, fərdi təhsil və peşə təhsili sistemində əsaslı islahatlara start verildi.
Son dövrlərdə ən qabaqcıl rəqəmsal öyrənmə trendlərinin araşdırılması və tətbiqi əsasında ölkəmizdə STEAM yanaşması tətbiq olunmağa başlanıldı. “STEAM Azərbaycan” layihəsi çərçivəsində Bakıda, o cümlədən biri Azərbaycan Dövlət Pedaqoji Universitetinin Səbail korpusunda və bir çox regionda ən müasir tələblərə cavab verən STEAM mərkəzləri istifadəyə verilib, növbəti dövrdə də yeni mərkəzlərin açılması nəzərdə tutulub.
2017-ci ildən etibarən şagirdlərin İKT bacarıqlarının inkişaf etdirilməsi məqsədilə Elm və Təhsil Nazirliyi tərəfindən “Rəqəmsal bacarıqlar” layihəsi icra olunur ki, cari ildə layihə çərçivəsində 410 mindən çox şagird İKT-dən daha praktik və səmərəli istifadə bacarıqlarına yiyələnəcək.
Ümumtəhsil məktəblərində rəqəmsal bacarıqların şagirdlərə aşılanması məqsədilə yeni yetişən müəllimlərə lazımi bilik və bacarıqların ötürülməsi üçün Elm və Təhsil Nazirliyi və “Alqoritmika” şirkəti ilə əməkdaşlıq çərçivəsində 2022-ci ildən etibarən Azərbaycan Dövlət Pedaqoji Universitetinin (ADPU) tələbələri üçün “Alqoritmika - rəqəmsal bacarıqların inkişafı” layihəsi icra olunur. Layihə çərçivəsində ADPU-da 160 kompüterdən ibarət 5 yeni laboratoriya istifadəyə verilib. Hər il ADPU-nun son tədris ili tələbəsi olan, gələcəyin yüzlərlə informatika müəllimləri üçün əlavə təlim kursları təşkil olunur və sertifikatlaşdırılır.
“Prezident İlham Əliyevin təhsilin hərtərəfli inkişafına yüksək diqqəti nəticəsində ölkəmizdə müəllim nüfuzunun artırılması istiqamətində xeyli iş icra olunub. 2014-cü ildən tətbiq olunan müəllimlərin işə qəbulu müsabiqəsi, eyni zamanda, ötən tədris ilindən start verilən müəllimlərin bilik və bacarıqlarının sertifikasiya olunması prosesləri çərçivəsində gənclərin müəllimliyə həvəsinin artırılması istiqamətində ciddi dönüş yaranıb. Həmçinin 500-dən çox balla ilk seçimdə müəllimlik ixtisaslarını göstərən tələbələrə Elm və Təhsil Nazirliyinin xüsusi “Gələcəyin müəllimi” təqaüdü verilir. Bütün bunların nəticəsidir ki, son illərdə ADPU-ya 500-dən yüksək balla qəbul olanların sayında, eləcə də qəbul planının tam dolmasında dinamika müşahidə olunur, ölkə üzrə 600 baldan yüksək balla müəllimlik peşəsini seçənlərin sayındakı artım isə artıq bu peşənin yenidən böyük ictimai nüfuz qazandığını sübut edir. Hələ 10 il öncə “Azərbaycanın əldə etdiyi bütün nailiyyətlərin əsasında müəllimin gərgin zəhməti və gündəlik fəaliyyəti durur” deyən Azərbaycan Prezidenti müəllim əməyinin möcüzəsini və müəllimi, məktəbi güclü olan dövlətin gücünü çox yaxşı görürdü. Məhz düşünülmüş siyasət, dayanıqlı iqtisadiyyat və inkişaf edən, milli təhsil sistemi sayəsində xalqımız Vətən müharibəsində böyük qələbə qazandı. Bu gün isə Azərbaycan müəllimi azad Qarabağ və Şərqi Zəngəzurda, Zəngilan, Şuşa, Füzuli, Laçın və Tərtərdə yeni istifadəyə verilmiş məktəblərdə yeni dövrün gənclərini tərbiyə edir. Bu gənclər isə tarixi zəfərləri qazanmış, ərazi bütövlüyünü təmin etmiş, bütün ərazisində suverenliyini təmin etmiş qüdrətli dövlətin və yüksək rifah cəmiyyətinin vətəndaşları olacaq.