“Professor Gövhər Baxşəliyeva” kitabı nəşr olunmuşdur
Bakı, 1 noyabr (AZƏRTAC). AMEA-nın akademik Zİya Bünyadov adına Şərqşünaslıq İnstitutunun direktoru, Milli Məclisin deputatı, professor Gövhər Baxşəliyevanın həm elmi, həm təşkilati, həm də ictimai fəaliyyəti respublikamızda çoxlarına məlumdur. Dəyərli elmi tədqiqatları, çoxsaylı elmi məqalələri ilə nəşr edilmiş kitablarından, elmi jurnallardan, kütləvi informasiya vasitələrindən yaxşı tanış olan elmi ictimaiyyətimiz indi Gövhər Baxşəliyevanın yuxarıda sadalanan bütün sahələrdə fəaliyyəti ilə bağlı bir mənbədən ətraflı məlumat ala biləcəkdir. Bu mənbə Azərbaycanda Atatürk Mərkəzinin müdiri, Milli Məclisin mədəniyyət komitəsinin sədri, AMEA-nın müxbir üzvü Nizami Cəfərovun yeni işıq üzü görmüş “Professor Gövhər Baxşəliyeva” kitabıdır.
İnstitutdan AZƏRTAC-a bildirmişlər ki, kitabda Gövhər Baxşəliyevanın elmi əsərləri, məqalələri, nüfuzlu beynəlxalq konfranslarda iştirakı haqqında geniş məlumat verilir, onun AMEA Şərqşünaslıq İnstitutuna rəhbərliyində elm təşkilatçısı kimi fəaliyyəti, şərqşünas kadrların hazırlanmasında rolu hərtərəfli əks olunur. Eyni zamanda, G. Baxşəliyevanın Milli Məclisin deputatı, parlamentin elm və təhsil komitəsinin üzvü, Azərbaycan Respublikası Milli Məclisinin İslam Əməkdaşlıq Təşkilatı Parlament İttifaqında nümayəndə heyətinin rəhbəri kimi fəaliyyətindən bəhs edilir.
Bölmənin digər xəbərləri
