Psixoloqların işə qəbulu müsabiqəsinin test imtahanı keçirilib
Bakı, 5 mart, AZƏRTAC
Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrində psixoloq vəzifəsinə işə qəbul üzrə müsabiqənin test imtahanı mərhələsi keçirilib.
BŞTİ-dən AZƏRTAC-a bildirilib ki, paytaxtdakı 263 və 158 nömrəli tam orta məktəblərdə təşkil olunan test imtahanında 312 namizəd iştirak edib.
İmtahanda namizədlərə 40 (ixtisas üzrə hər biri 3 bal olmaqla 20 sual, İKT səriştələri üzrə hər biri 2 bal olmaqla 10 sual və məntiq üzrə hər biri 2 bal olmaqla 10 sual) test tapşırığının cavablandırılması üçün 90 dəqiqə vaxt verilib.
Məktəbəqədər və Ümumi Təhsil üzrə Dövlət Agentliyinin direktor müavini, Bakı Şəhəri üzrə Təhsil İdarəsinin müdiri vəzifəsini müvəqqəti icra edən Nərminə Hüseynova imtahan prosesini müşahidə edib.
Test imtahanının nəticələri barədə məlumat bir həftə ərzində namizədlərə SMS vasitəsilə göndəriləcək.
Keçid bal həddi (ixtisas üzrə minimum 42 bal, İKT üzrə minimum 10 bal, məntiq üzrə minimum 10 bal) 62 bal olaraq müəyyən edilib. 62 və daha yüksək bal toplayan namizədlər müsabiqənin müsahibə mərhələsinə dəvət ediləcək.
Müsabiqənin müsahibə mərhələsində namizədə ixtisas üzrə açıq və praktik suallar veriləcək. Müsahibəni uğurla keçən namizədlər müsahibə nəticələrinə görə müvafiq vakant yerlərə yerləşdiriləcəklər.
Bölmənin digər xəbərləri
