Qanunsuz ov edənlər cərimələnmişlər
Bakı, 25 fevral (AZƏRTAC). Ekologiya və Təbii Sərvətlər Nazirliyi (ETSN) bu ilin yanvar-fevralında çöl quşları və heyvanlarının qanunsuz ovlanması hallarının qarşısını almaq məqsədilə reydlər keçirmişdir.
Nazirliyin mətbuat xidmətindən AZƏRTAC-a bildirmişlər ki, reydlər zamanı qanunsuz ovla məşğul olan 85 nəfərdən 73 ov tüfəngi, 233 ədəd patron, 164 quş, o cümlədən “Qırmızı kitab”a düşmüş fısıldayan qu, bəzgək quşları götürülmüşdür.
Faktlarla bağlı 55 nəfər barəsində protokol tərtib olunmuş, onlardan 24-ü inzibati qaydada 24 min manat məbləğində cərimə edilmişdir.
Reydlər zamanı qanun pozucuları tərəfindən sənədlərin təqdim edilməməsi, nazirliyin əməkdaşlarına müqavimət göstərilməsi, hətta fiziki zərər vurulması halları da olmuşdur. Fevralın 23-də ETSN-in 7 saylı ərazi ekologiya və təbii sərvətlər şöbəsinin əməkdaşları tərəfindən Sarı-su ovçuluq təsərrüfatının ərazisində Saatlı rayonunun Hacıqasımlı kəndinin qanunsuz ovla məşğul olan 3 sakini saxlanılmışdır. Həmin şəxslərdən biri şöbənin əməkdaşı Kərim Səlimova müqavimət göstərmiş, ov silahı ilə onun üz nayihəsinə zərbə endirərək yaralamışdır.
Şöbə əməkdaşlarının səyi nəticəsində qanun pozucularından biri saxlanılaraq ondan 1 ov tüfəngi, 17 ədəd patron, “Qırmızı Kitab”a düşmüş 5 fısıldayan Qu quşu götürülmüşdür.
Faktla bağlı qanunamüvafiq qaydada akt və protokol tərtib edilmişdir.
Bölmənin digər xəbərləri
