Qarabağ bölgəsində fəaliyyət göstərən media nümayəndələri mükafatlandırılıblar
Tərtər, 22 iyul, Tahir Ağaməmmədov, AZƏRTAC
Tərtər Rayon İcra Hakimiyyətinin Səfərbərlik və Hərbi Xidmətə Çağırış üzrə Dövlət Xidmətinin təşkilatçılığı ilə Tərtərdə Milli Mətbuat Günü qeyd edilib.
AZƏRTAC-ın bölgə müxbiri xəbər verir ki, tədbir iştirakçıları əvvəlcə Şəhidlər Abidə kompleksini və Ümummilli Lider Heydər Əliyevin abidəsini ziyarət edib, xatirələrinə hörmət əlaməti olaraq gül dəstələri düzüblər. YAP Tərtər rayon təşkilatının inzibati binasında davam edən tədbirdə rayon icra hakimiyyətinin başçısı Müstəqim Məmmədov çıxış edərək, kütləvi informasiya vasitələri nümayəndələrini peşə bayramları münasibətilə təbrik edib, əsası 1875-ci il iyulun 22-də "Əkinçi" qəzetinin nəşri ilə Həsən bəy Zərdabi tərəfindən qoyulan milli mətbuatımızın keçdiyi çətin və şərəfli yoldan danışıb. Bildirib ki, milli mətbuatımızın inkişafı Ulu Öndər Heydər Əliyevin adı ilə bağlıdır. Ulu Öndərin 1993-cü ildə xalqın təkidli tələbi ilə hakimiyyətə qayıdışı mətbuatımızın inkişaf tarixində də yeni mərhələ açdı. 1998-ci ildə Ümummilli Lider Heydər Əliyev tərəfindən Azərbaycan mətbuatının üzərindən dövlət senzurasının ləğv edilməsi ilə ölkəmizdə söz və mətbuat azadlığının əsası qoyuldu və bu mətbuatın inkişafına ciddi təkan verdi.
M.Məmmədov çıxışında Prezident İlham Əliyevin jurnalistlərə göstərdiyi diqqət və qayğıdan da bəhs edib, media nümayəndələrinin 44 günlük Vətən müharibəsində göstərdikləri fədakarlıqdan, qələmləri ilə informasiya müharibəsində göstərdikləri şücaətlərindən danışıb.
Tədbirdə Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi Elşən Abdullayev, “Respublika” qəzetinin bölgə müxbiri Vəli Vəliyev, AZƏRTAC-ın bölgə müxbiri Tahir Ağaməmmədov, İctimai Televiziyanın əməkdaşı Şöhrət Eyvazov, Xəzər TV-nin əməkdaşı Şamxal Adıgözəlov, AZTV-nin əməkdaşı Elnur Tofiqoğlu, “Aran” qəzetinin redaktoru Məhsəti Musa, Yeni Tərtər Qəzetinin redaktoru Svetlana Bağırova, EL TV-nin əməkdaşı Daşqın Abdullayev çıxış ediblər. Çıxışlarda qeyd olunub ki, milli mətbuatın yubileylərinin ölkədə geniş qeyd olunması, KİV-lərə yardımların göstərilməsi, mətbuat işçilərinin sosial müdafiəsinin gücləndirilməsi, onların mənzil-məişət şəraitinin yaxşılaşdırılması istiqamətində tədbirlər mətbuata və mətbuat işçilərinə qayğının tərkib hissəsidir.
Diqqətə çatdırılıb ki, Azərbaycan mediası həm Birinci, həm də İkinci Qarabağ müharibələrində üzərinə düşən vəzifəni layiqincə yerinə yetirib. 44 günlük Vətən müharibəsində və müharibədən sonrakı dövrdə Azərbaycan həqiqətlərinin dünyaya çatdırılmasında mətbuatın rolu və jurnalistlərin fəaliyyəti böyükdür. Məhz nümayiş olunan peşəkarlıq, fədakarlıq və çeviklik sayəsində dünya ictimaiyyətinə müharibə ilə əlaqədar, o cümlədən Ermənistanın törətdiyi müharibə cinayətləri haqqında dolğun məlumatların çatdırılması mümkün olub. Bu işlərin həyata keçirilməsində ən böyük missiyanı Ali Baş Komandanın özü həyata keçirib. Onun 44 günlük Vətən müharibəsi dövründə beynəlxalq media qurumlarına geniş müsahibələri bu reallıqların dünya ictimaiyyətinə çatdırılmasında müstəsna rol oynayıb.
Sonra bir qrup media nümayəndəsinə rayon icra hakimiyyəti və Səfərbərlik və Hərbi Xidmətə Çağırış üzrə Dövlət Xidmətinin fəxri fərman və hədiyyələr təqdim olunub.
22 İyul - Milli Mətbuat Günü münasibətilə Qarabağ Regional Təhsil İdarəsində və Bərdə Rayon Mərkəzi Xəstəxanasında da tədbirlər keçirilib, bölgədə fəaliyyət göstərən media nümayəndələri mükafatlandırılıb.
Bölmənin digər xəbərləri
