Qatvik Britaniyanın ən pis göstəriciyə malik hava limanı seçilib
London, 21 aprel, AZƏRTAC
Böyük Britaniyada uçuş gecikmələri ilə bağlı aparılan araşdırmaya görə Qatvik hava limanı yenidən ölkənin ən pis göstəriciyə malik aeroportu olub.
AZƏRTAC BBC-yə istinadla xəbər verir ki, Mülki Aviasiya İdarəsinin (CAA) məlumatlarına əsasən Londona xidmət göstərən, Qərbi Sasseksdə yerləşən bu hava limanından 2024-cü ildə həyata keçirilən reyslərin ortalama gecikmə müddəti 23 dəqiqəni keçib.
Əvvəlki 12 ayla müqayisədə gecikmə müddəti təxminən 27 dəqiqədən azalaraq nisbətən yaxşılaşsa da, Qatvik hələ də Britaniyanın digər hava limanları arasında ən zəif göstəriciyə malikdir.
Böyük Britaniyanın ikinci ən sıx qrafikə sahib hava limanı olan Qatvikə 2024-cü ildə Avropada hava nəqliyyatı idarəçilərinin çatışmazlığı ciddi təsir edib. Eyni problem hava limanının idarəetmə qülləsində də yaşanıb.
Birminqem hava limanı isə ötən il reyslərin vaxtında həyata keçirilməsi baxımından ikinci ən zəif nəticəni göstərib. Burada uçuşların orta gecikmə müddəti 21 dəqiqədən çox olub. Üçüncü yerdə isə Mançester hava limanı qərarlaşıb. Burada gecikmələrin orta müddəti 20 dəqiqə təşkil edib.
Bölmənin digər xəbərləri
