QAX BƏLƏDİYYƏSİ HESABAT VERİR
AZƏRTAC-ın müxbiri xəbər verir ki, şəhər ictimaiyyəti nümayəndələrinin, idarə və müəssisə rəhbərlərinin iştirakı ilə keçirilən yığıncağı giriş sözü ilə açan şəhər bələdiyyəsinin sədri Nizami Abdullayev yerli özünüidarəetmə orqanının fəaliyyəti barədə ətraflı məlumat vermiş, əldə edilmiş nailiyyətlərdən və görüləcək işlərdən söhbət açmışdır. Natiq qeyd etmişdir ki, şəhərin abadlaşdırılması, sakinlərin maddi təminatının yaxşılaşdırılması və onların yaşayışı ilə bağlı problemlərin uğurlu həlli istiqamətində həyata keçirilən məqsədyönlü tədbirlər nəticəsində şəhər bələdiyyəsinin əhali arasında nüfuzu xeyli yüksəlmişdir. Hesabat ilində bələdiyyənin gəlirləri əvvəlki illərlə müqayisədə 3 dəfə artaraq 91 milyon manata çatmışdır. Gəlirlərin əsas hissəsi şəhərdə “Heydər bağı”nın salınmasına, küçə və meydanların təmirinə, yeni yaşayış massivinə su çəkilməsinə, mədəni-kütləvi və idman tədbirlərinin keçirilməsinə, yardımların verilməsinə sərf edilmişdir.
Yığıncaqda çıxış edənlər şəhər bələdiyyəsinin maliyyə imkanlarının daha da genişləndirilməsi və gəlirlərin artırılması üçün, ilk növbədə, bu orqanın tərkibində yeni emal müəssisələrinin və istehsal sahələrinin yaradılmasının vacibliyini qeyd etmişlər.
Hesabat yığıncağında 2004-2008-ci illər üçün Azərbaycan Respublikası regionlarının sosial-iqtisadi inkişafı Dövlət Proqramının tələblərinin yerinə yetirilməsində dövlət strukturları ilə yanaşı, bələdiyyələrin də üzərinə böyük vəzifələr düşdüyü qeyd edilmişdir.
