QAZ HASİLATI ARTACAQ
“Azneft” İstehsalat Birliyindən AZƏRTAC-a bildirmişlər ki, “Xəzərdənizneftqaztikinti” Trestinin kollektivi “Günəşli” yatağındakı 26 kilometrlik özüllərarası sualtı qaz xətlərinin tikintisini sürətlə davam etdirir. Artıq 8 kilometr uzunluğunda boru qaynaq edilmiş, onun 2,8 kilometrlik hissəsi sərbəst batırılma üsulu ilə nəql olunmuşdur. Tikinti-quraşdırma işlərini gələn il başa çatdırmaq nəzərdə tutulmuşdur. “Günəşli” yatağındakı 4 nömrəli dərin dəniz özülündən Neft daşlarındakı qaz separasiya məntəqəsinədək 21 kilometr uzunluğunda kəmərin tikintisi ilə bağlı işlər də davam edir. Bu müddət ərzində “Süleyman Vəzirov” borudüzən gəmisi vasitəsilə 8,7 kilometrlik qaz kəməri çəkilmiş, separasiya bloku quraşdırılmışdır. Obyektdə 2 milyon 411,6 min manatlıq iş görülmüşdür. Bu işlər ölkəmizdə ən iri qaz hasilatçısı olan “Günəşli” yatağından çıxarılan qazın sahilə tam həcmdə nəql edilməsinə imkan yaradacaqdır.
Bölmənin digər xəbərləri
