QAZ TƏSƏRRÜFATINDA TİKİNTİ İŞLƏRİ APARILIR

29.10.2006 [11:28]
Çap et
A⁺ A^-

“Azəriqaz” Qapalı Səhmdar Cəmiyyətindən AZƏRTAC-a verilən məlumata görə, Astara-Qazıməmməd magistral qaz kəmərinin 65-ci kilometrindən - Masallı rayonunun Tüklə kəndi yaxınlığından başlayaraq Ordaxal kəndinədək təzyiqi 15 atmosfer, diametri isə 325 millimetr olan 28 kilometr uzunluğunda, Ordaxal kəndindən Yardımlı qəsəbəsinədək 28 kilometr uzunluğunda 219 millimetrlik magistral qaz kəməri çəkilib istismara verilmişdir. Yardımlı rayon mərkəzində bir qazpaylayıcı stansiya inşa edilmiş və 30 kilometrədək müxtəlif diametrli qaz xətləri çəkilmiş, 11 qaztənzimləyici quraşdırılmış, qaz təminatına və ölçü qovşağına nəzarət məqsədi ilə normal iş şəraiti və kommunikasiyalarla təmin olunmuş operator binasının və qaz istismarı idarəsi üçün inzibati binanın tikilib istifadəyə verilməsi başa çatdırılmışdır.

Magistral borular dəniz səviyyəsindən 1200-1500 metr hündürlükdə 36 yol və 6 çay keçidindən, 12 kilometr uzunluğunda sıldırım qayalardan və 10 kilometr sıx meşəlikdən çəkilmişdir. Layihənin icrası ilə bağlı 11 milyon 500 min manatlıq, o cümlədən büdcə vəsaiti hesabına 9 milyon 180 min manatlıq iş görülmüşdür. Kəmərin çəkilməsində həm yerli əhali, həm də mütəxəssislər iştirak etmişlər. Yardımlı qaz istismarı sahəsində 22 nəfər daimi işlə təmin olunmuşdur.

Lerik və Yardımlı rayon mərkəzlərində bütün abonentlər “Azəriqaz” Səhmdar Cəmiyyətinin vəsaiti hesabına qaz pilətəsi və sayğacla təmin olunacaqlar. Hazırda Yardımlı qəsəbəsində evlərdə mətbəx sobaları və sayğaclar quraşdırılır. Bu işlər ilin sonunadək başa çatdırılacaqdır. Satılan qazın uçotu abonent-kompyuter sistemi ilə aparılacaq, hər bir abonentlə fərdi qaydada müqavilə bağlanacaqdır.

Ağcabədi və Beyləqan rayonlarında da qaz təminatının bərpası üçün layihə-smeta sənədlərinin hazırlanmasına başlanmışdır. Bu rayonların qazlaşdırılması 2007-ci ildə davam etdiriləcəkdir.

QAZ TƏSƏRRÜFATINDA TİKİNTİ İŞLƏRİ APARILIR

MÜƏLLİFLƏ ƏLAQƏ

Bölmənin digər xəbərləri