Qazaxda akademik Zərifə Əliyevanın 100 illik yubileyinə həsr edilən tədbir keçirilib
Bakı, 13 aprel, AZƏRTAC
Qazax Müalicə Diaqnostika Mərkəzində görkəmli oftalmoloq-alim, akademik Zərifə Əliyevanın anadan olmasının 100 illik yubileyinə həsr edilən “Həkim, cəmiyyət, xəstə: Mənəviyyat və fəal həyat mövqeyi ideyaları" mövzusunda tədbir keçirilib.
AZƏRTAC Qazax Müalicə Diaqnostika Mərkəzinə istinadla bildirir ki, tədbirdə Qazax Rayon İcra Hakimiyyətinin nümayəndəsi Gülayə Həsənova Azərbaycan tibb elmində özünəməxsus yeri olan akademik Zərifə Əliyevanın keçdiyi zəngin və şərəfli ömür yolundan bəhs edib. Oftalmoloq-alimin çoxşaxəli elmi-pedaqoji fəaliyyəti ilə Azərbaycanın tibbində parlaq səhifələr açdığını deyən G.Həsənova onun əziz xatirəsinin hər zaman dərin ehtiramla yad edildiyini vurğulayıb. O, Zərifə Əliyevanın nümunəvi həyat yolunun gənc nəsillər arasında təbliğinin vacib olmasından danışıb.
Sonra mərkəzin direktoru Kamandar İbrahimov akademik Zərifə Əliyevanın alim, müəllim, həkim kimi məhsuldar elmi və pedaqoji fəaliyyətindən, tibb sahəsində əldə etdiyi nailiyyətlərdən, yeni nəslin yetişdirilməsindəki rolundan, vəfalı həyat yoldaşı, fədakar və qayğıkeş ana kimi ailəsinə sədaqətindən, milli dəyərlərə bağlılığından və ailə üzvlərinin onunla bağlı bölüşdükləri maraqlı xatirələrdən bəhs edib.
Mərkəzin həkim-terapevti Elxan Bayramov akademik Zərifə Əliyevanın uşaq evlərində tərbiyə alan kimsəsiz uşaqlar arasında yayılan traxoma xəstəliyinin qarşısını almaqda xüsusi xidmət göstərdiyini və böyük alimin yalnız çalışdığı institutda fəaliyyət göstərməklə kifayətlənmədiyini, onun respublikanın şəhər və rayonlarını bir-bir gəzərək, xəstəliyin yaranma səbəblərini araşdırdığını və xəstəlik ocaqlarında kompleks şəkildə müalicə-profilaktik tədbirləri həyata keçirdiyini diqqətə çatdırıb.
Tədbirdə mərkəzin ictimaiyyətlə əlaqələr üzrə mütəxəssisi Günel Bəxtiyarlı və böyük tibb bacısı Şəlalə İsmayılova qeyd ediblər ki, Zərifə xanım Ümummilli Liderlə çiyin-çiyinə addımlayıb, çətin günlərdə ona arxa-dayaq olub. O, bu yükü kövrək çiyinlərində böyük mətanət və fədakarlıqla daşıyırdı. Eyni zamanda, övladlarını vətənin layiqli vətəndaşları, öz nəslinin yüksək mənəvi dəyərlərinin varisi kimi yetişdirib.
Sonda Zərifə Əliyevanın həyat və fəaliyyətini əks etdirən film nümayiş olunub.
Bölmənin digər xəbərləri
