QAZAXISTAN PREZİDENTİ NURSULTAN NAZARBAYEVİN NİTQİ
-Hörmətli İlham Heydər oğlu!
Xanımlar və cənablar!
Sizi qonaqpərvər Qazaxıstan torpağında ürəkdən salamlamağıma şadam!
Mən bu gün bir daha təəssüf edirəm ki, böyük dostum Heydər Əliyev bizimlə birlikdə deyildir. Mən Azərbaycan xalqının böyük, öz həyatını müstəqil və firavan Azərbaycan qurulmasına həsr etmiş oğluna həmişə dərin hörmət və səmimi rəğbət hissləri bəsləmişəm. Qazaxıstan xalqı onun ölkələrimiz arasında qardaşlıq münasibətlərinin inkişafına verdiyi töhfəni yüksək qiymətləndirir.
Bizim dostluq və etibarlı tərəfdaşlığın parlaq nümunələri ilə dolu olan ümumi tariximiz var. İnsanlarımızın mənşəcə və mənəvi baxımdan yaxınlığı müstəqillik əldə edildikdən sonra nəinki qorunub saxlanılmış, həm də möhkəmlənmişdir.
Bu gün keçirilən və məsələlərin geniş dairəsini müzakirə etdiyimiz görüşün səmərəliliyini vurğulamaq istəyirəm. Danışıqlarımız etimad ruhunda keçdi və Qazaxıstan ilə Azərbaycan arasında müxtəlif sahələrdə əməkdaşlığın daha da inkişaf etdirilməsinə yönəlmişdi.
Regional və beynəlxalq siyasətə dair bir çox məsələlərdə mövqelərimizin oxşarlığını vurğulamaq xoşdur. Bu, Müstəqil Dövlətlər Birliyi ilə bağlı məsələlərə, çoxtərəfli inteqrasiya, dünyada sabitlik və təhlükəsizliyin möhkəmləndirilməsi proseslərinə aiddir.
Ölkələrimizin öz inkişafının dinamik mərhələsini yaşamasının Qazaxıstan-Azərbaycan münasibətlərini möhkəmləndirmək üçün böyük əhəmiyyəti var. Qazaxıstanda da, Azərbaycanda da əsas sosial-iqtisadi göstəricilərin sürətli artımı müşahidə olunur. Bu, əməkdaşlığımızın bir çox sahələrdə möhkəmləndirilməsinə, iqtisadiyyatda və sosial sahədə aparılan islahatlara dair təcrübə mübadiləsinə olan qarşılıqlı marağı əhəmiyyətli dərəcədə genişləndirir.
Bizim qarşımızda kooperasiyanın səmərəli modellərini işləyib hazırlamaq, əməkdaşlığın, o cümlədən energetika və nəqliyyat sektorlarında işbirliyinin yeni imkanlarını müəyyən etmək, mal dövriyyəsinin strukturunu şaxələndirmək vəzifəsi durur. Əminəm ki, bu gün ikitərəfli sənədlərin imzalanması, habelə İlham Heydər oğlu ilə görüşümüzdə əldə olunmuş razılaşmaların həyata keçirilməsi buna kömək edəcəkdir.
Azərbaycan məsəlində deyilir: “Söz danışıqdan keçər”. Əminəm ki, ölkələrimiz arasında olan qarşılıqlı anlaşmanın yüksək səviyyəsi, xalqlarımız arasındakı qardaşlıq və mənəvi yaxınlıq hissləri qarşılıqlı surətdə faydalı ticarət-iqtisadi və mədəni-humanitar əməkdaşlığın daha da möhkəmlənməsinə təkan verəcəkdir.
Xanımlar və cənablar!
Mən Azərbaycan Respublikasının Prezidenti İlham Əliyevin şərəfinə badə qaldırıram!
Xalqlarımız arasındakı əbədi və sarsılmaz dostluğun şərəfinə!
Qazaxıstanın və Azərbaycanın daha da tərəqqisi, firavanlığı və mehriban qonşuluğu şərəfinə!
Əlavə etmək istərdim ki, Azərbaycan iqtisadiyyatının çox böyük yüksəlişini, təkcə regionda deyil, həm də dünyada mühüm dövlətə çevrilən Azərbaycanın tərəqqisini biz Qazaxıstanda çox böyük fərəhlə müşahidə edirik.
Astananın qurulmasında lap əvvəldən Heydər Əlirza oğlunun əhəmiyyətli rolu olmuşdur. O, burada dəfələrlə olmuşdur və biz dəvət edəndə, tədbirlər keçirəndə heç vaxt imtina etməmişdir. Azərbaycanın bugünkü gününün arzusunda olan bu insan belə idi. Düşünürəm ki, İlham Heydər oğlu bu gün atasının işini davam etdirməklə yanaşı, özü də Azərbaycanı inkişaf və tərəqqi yolu ilə irəliyə aparan Prezident və rəhbərdir. Bu, dost və qardaş ölkə kimi Qazaxıstanı çox sevindirir. Biz ölkələrimizin və xalqlarımızın gələcəyini birgə qurmağa hazırıq.
İcazə verin, badələri Azərbaycan Prezidentinin, habelə qardaş Azərbaycan xalqının sağlığına, xalqlarımızın və dövlətlərimizin dostluğu şərəfinə qaldırım!
Bölmənin digər xəbərləri
