Qazaxıstan və Aİ Orta Dəhlizin inkişafı və nəqliyyatın rəqəmsallaşdırılması məsələlərini müzakirə ediblər
Astana, 22 may, AZƏRTAC
Trans-Xəzər Beynəlxalq Nəqliyyat Marşrutu tranzit daşımalarında müsbət artım nümayiş etdirir - yüklərin çatdırılma müddəti azalır və konteyner həcmləri artır.
AZƏRTAC Qazaxıstan Nəqliyyat Nazirliyinə istinadla xəbər verir ki, bu barədə Qazaxıstan nəqliyyat nazirinin müavini Janibek Tayjanovla Avropa Komissiyasının Beynəlxalq Tərəfdaşlıqlar üzrə Baş Direktorluğunun dayanıqlı nəqliyyat rəhbəri Serxio Ollyete Xosa arasında Astanada keçirilən görüşdə qeyd edilib.
Görüşdə Xəzər regionunda liman infrastrukturunun inkişafına, xüsusən də AYİB və Aİ-nin maliyyə dəstəyi ilə Aktau dəniz limanında körpülərin yenidən qurulmasına, eləcə də Xəzər dənizində bərə xidmətlərinin yaxşılaşdırılmasına xüsusi diqqət yetirilib.
Tərəflər, həmçinin nəqliyyat və logistika proseslərinin rəqəmsallaşdırılmasını, o cümlədən elektron sənəd idarəetmə platformalarının inkişafını və beynəlxalq avtomobil daşımalarında icazələrin elektron mübadiləsinə keçidini müzakirə ediblər. Qazaxıstan Aİ ölkələrini bu layihəyə qoşulmağa dəvət edib.
Görüşdən sonra tərəflər nəqliyyat tərəfdaşlığını daha da gücləndirmək üzrə qarşılıqlı maraqlarını təsdiqləyiblər və Trans-Xəzər dəhlizini Asiya ilə Avropa arasında etibarlı və rəqabətli bir marşrut kimi inkişaf etdirmək üçün konstruktiv dialoqu davam etdirməyə hazır olduqlarını bildiriblər.
Bölmənin digər xəbərləri
