Qazaxıstanla Çin arasında dəmir yolu daşımalarının həcmi 18 faiz artıb
Astana, 21 fevral, AZƏRTAC
Cari ilin yanvar ayında Qazaxıstan ilə Çin arasında dəmir yolu daşımalarının həcmi 2,8 milyon tona çatıb ki, bu da 2024-cü ilin analoji dövrü ilə müqayisədə 18 faiz çoxdur.
AZƏRTAC “Qazaxıstan demir yolu” SC-nin mətbuat xidmətinə istinadla xəbər verir ki, “Dostuk” sərhəd-keçid məntəqəsi ilə daşımalarda 12 faiz artım qeydə alınıb və 1,5 milyon tona çatıb. “Altınkol” keçidi ilə 1,3 milyon ton yük daşınıb ki, bu da ötən ilin yanvar ayı ilə müqayisədə 25 faiz çoxdur.
Qazaxıstan mallarının Çinə ixracı 5 faiz artaraq 1,1 milyon ton təşkil edib. Metal filizlərinin daşınması 5 faiz (652 min ton), qara metalların 77 faiz (104 min ton), neft məhsulları 50 faiz (32 min ton) və digər yüklərin (kəpək, qarışıq yem, bitki yağı) daşınması 30 faiz (215 min ton) artıb.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
