Qəhrəman kəşfiyyatçı İbad Hüseynov sağlığında əfsanələşmiş qəhrəmana çevrilmişdir
Bakı, 2 may (AZƏRTAC). Mayın 2-də Azərbaycan Dövlət Pedaqoji Universitetində Səbail Rayon Gənclər və İdman İdarəsinin təşkilatçılığı ilə “Azərbaycan Bayrağı” ordenli keçmiş döyüşçü, qəhrəman kəşfiyyatçı İbad Hüseynov ilə universitetin müəllim və tələbə heyətinin görüşü olmuşdur.
AZƏRTAC xəbər verir ki, əvvəlcə Azərbaycanın dövlət himni səslənmişdir.
Sonra “Büllur” studiyasının istehsalı olan və İbad Hüseynovun qəhrəmanlıqlarından, Vətənə, torpağa sevgisindən bəhs edən “Kəşfiyyatçı” sənədli filmi nümayiş etdirilmişdir. Rejissoru və ssenari müəllifi Etibar Məmmədovun olduğu filmdə erməni terrorçusunu zərərsizləşdirən İbad Hüseynovun şəxsi şücaəti haqqında da məlumat verilir. Hadisələrin canlı şahidlərinin filmdə yer alan fikirləri Müdafiə Nazirliyinin Arxiv İdarəsindən əldə olunmuş rəsmi arayışlarda da öz əksini tapmışdır.
Filmin nümayişindən sonra Milli Məclisin deputatı Aqil Abbas, Səbail Rayon Gənclər və İdman İdarəsinin rəisi Vüqar Mürsəlov, İbad Hüseynovun döyüş yoldaşı Akif Qasımov və başqaları çıxış edərək tədbirin əhəmiyyətindən danışmış, hər zaman ürəyi Vətən eşqi ilə döyünən kəşfiyyatçı İbad Hüseynovun keçdiyi döyüş yoluna nəzər salmış, ulu öndər Heydər Əliyevin ona yüksək münasibətini, xalqın sevgisini diqqətə çatdırmışlar.
Bildirilmişdir ki, İbad Hüseynov çətin sınaqlardan uğurla çıxmışdır. İgid kəşfiyyatçı nəinki Azərbaycan xalqı və türk dünyasının, bütövlükdə insanlığın qarşısında böyük xidmət göstərərək Monte Melkonyan kimi qəddar terrorçunu aradan götürmüşdür. İbad Hüseynov sağlığında əfsanələşmiş qəhrəmana çevrilmişdir. Ona görə xalqımız daim belə oğulları ilə fəxr etməlidir.
Qeyd olunmuşdur ki, gənclər xalqımızın yaşadığı faciələr, soyqırımları haqqında məlumatlı olmaqla yanaşı, Vətənimizin azadlığı uğrunda gedən döyüşlərdə qəhrəmancasına vuruşmuş, düşmənə sarsıdıcı zərbələr endirmiş İbad Hüseynovu, bu igid kəşfiyyatçının döyüş yoldaşlarını tanımalı və onlardan nümunə götürməlidirlər. Gənc nəslin vətənpərvər ruhda böyüməsi üçün belə canlı qəhrəmanlar təbliğ edilməlidir. Çünki onların keçdiyi döyüş yolu tələbələr və gənclərimiz üçün bir örnəkdir.
Müəllifi qəhrəmanın cəbhə yoldaşı Sahib Şirinov olan, qəhrəman kəşfiyyatçı İbad Hüseynovun uşaqlıq və gənclik illərindən, döyüş həyatından, keçirdiyi uğurlu əməliyyatlardan bəhs edən “Xüsusi təyinatlı” kitabının ali və orta məktəblərdə yayılmasının vacibliyi vurğulanmışdır.
Tədbirdə erməni terrorçularının əməllərini əks etdirən şəkillər də göstərilmişdir.
Sonda qəhrəman kəşfiyyatçı İbad Hüseynov çıxış edərək işğal altında olan torpaqlarımızın düşmənlərdən təmizlənməsi naminə yenidən döyüşə atılmağa hazır olduğunu demiş, tədbirin təşkilatçılarına və iştirakçılarına minnətdarlığını bildirmişdir.
Bölmənin digər xəbərləri
