Qənirə Paşayeva: Minsk qrupunun uzun sürən etibarsızlığı...
Bakı, 15 dekabr, AZƏRTAC
Azərbaycan Prezidenti İlham Əliyevin ATƏT-in Minsk qrupunun Fransadan və ABŞ-dan olan həmsədrləri ilə görüşdəki çıxışı son günlər KİV-lərdə, sosial şəbəkələrdə geniş müzakirə olunur. Həmsədrlər üç onillik boyunca, demək olar, faydasız səfərlərinə haqq qazandırmaq üçün hər hansı cəhd göstərməyin belə yararsız olduğunu anındaca qəbul etdilər. O Minsk qrupu əvvəl-axır rəsmən buraxılacaq, həmsədr ölkələri təmsil edən diplomatlar xidmətdən uzaqlaşacaq və s. Amma bu qrupun diplomatiya tarixinin ən uzunmüddətli və uğursuz missiyalarından biri kimi tarixə düşəcəyi şəksizdir. Bizim Qarabağda aldığımız yaralar sağalacaq, şəhərlərimizi, qəsəbələrimizi, kəndlərimizi bərpa edəcəyik. ATƏT-in Minsk qrupunun həmsədrlərinin isə ilahi ədalətin mühakiməsindən iki dünyada qurtulmaq şansı olmayacaq. Minsk qrupunun missiyasının uğursuzluğu yalnız Ermənistanın ərkəsöyünlüyü ilə bağlı deyil, bu, həmsədr ölkələrin məqsədyönlü uğursuzluqda maraqlı olması ilə bağlıdır, desək yanlış olmazdı.
AZƏRTAC xəbər verir ki, bu fikirləri Milli Məclisin mədəniyyət komitəsinin sədri Qənirə Paşayeva bildirib.
Q.Paşayeva deyib: “Necə ola bilər ki, ATƏT-in Minsk qrupu həmsədrlərinin birindən, demək olar, 90 faiz, digər ikisindən qismən asılı olan cırtdan Ermənistan onların sözünü uzun illər boyu yerinə yetirməyə bilsin?! Ən sadəlövh insan belə buna inanarmı? Dövlətimizin başçısı haqlı olaraq Minsk qrupunun işinə öz iradlarını həmişə bildirib, budəfəki münasibət də istisna təşkil etmədi. Cənab Prezident çıxışını bu sözlərlə bitirdi: “Bununla, mən sözlərimi yekunlaşdırıram ki, sizi dinləyim, çünki buraya gəlmək sizin ideyanız idi. Bunu bir daha kameralar qarşısında deyə bilərəm. Mən Minsk qrupunu səfərə dəvət etməmişəm. Lakin mənə məlumat verəndə ki, Minsk qrupu gəlmək istəyir, dedim gəlsinlər, etiraz etmirəm. Bəlkə onların mənə sözləri var. Əgər siz bunu kamera qarşısında söyləmək istəyirsinizsə, buyurun. Əgər istəmirsinizsə, mən onlara deyim getsinlər. Necə istəsəniz. Buyurun, sizi dinləyirəm”.
Həmsədrlərin haqq etdiyi bu sözlərdən sonra ağla gələn ilk sual bu olar: Dünyanın ən qonaqpərvər ölkələrindən birinin liderini “Mən Minsk qrupunu səfərə dəvət etməmişəm” deməyə nə vadar edir? - Bəli, bu cavabı Minsk qrupu özü öz işi ilə haqq etdi. Uzun sürən etibarsızlığın bir son nöqtəsi, nidası olmalı idi əvvəl-axır. Biz dünyanın üç böyük ölkəsinin həmsədr sifəti ilə 28 ilə həll edə bilmədiyi işi 44 gün içində çözdük! Buna Azərbaycanın “dəmir yumruğu” deyərlər. O yumruq ki, uzun illər ərzində işğalçının başına enməsinin qarşısını məhz vasitəsiz vasitəçilər, sülh yarada bilməyən “sülhyaradıcılar” alıb. Azərbaycanın sülhə sadiqliyini, qan tökülməsində maraqlı olmadığını başa düşmək üçün diplomat olmağa, böyük dövlətin təmsilçisi olmağa ehtiyac yoxdur. Bunun üçün, sadəcə, vicdanlı olmaq və vicdanın səsini ifadə etmə cəsarətinə sahib olmaq yetərlidir. Doğrudur, biz ölkə olaraq çox əziyyətlər çəkdik, itkilərimiz çox oldu, lakin bizi inandırmağa, “müharibə yox, sülh yolu” sofizmi ilə, Ermənistanın işğal etdiyi torpaqlarda möhkəmlənməsinə münbit şərait yaratmış dövlətlərin, o cümlədən Ermənistanın özünün itirdikləri də az olmadı. ATƏT-in Minsk qrupu bu vəsilə ilə həmsədrlər və ATƏT özü etibarını sarsıtmış oldu. Əgər Ermənistan və ikili standartlardan əl çəkə bilməyənlər, işğalçı ilə işğala məruz qalanı bərabər tutanlar nəticə etibarilə öz istəklərinə nail ola bilmədisə, bu, bir daha, kimin daha çox itkiyə məruz qaldığını və ilahi ədaləti ifadə və təcəssüm etdirmiş olur...
Bölgədə yeni reallıqlar yaranıb. Bəli məhz yeni və məhz reallıqlar - işğalçı tarixi zərbəsini alıb, onun qalib ədası sıfırlanıb, əsl qalibin kim olduğu gün kimi aydın olub. Vasitəsiz vasitəçilərin iç üzü təkzibolunmaz şəkildə müəyyənləşib. Həmsədrlərin Azərbaycana son səfərindən ötən bir il ərzində bölgə və dünyadakı durum çox dəyişib, artıq yeni yanaşmalara ehtiyac var. Qalib Azərbaycan ədalətli sülh üçün xahiş etmir, işğalçılığın durdurulması üçün müraciət etmir. Həmsədr ölkələrin liderləri “münaqişənin hərbi həlli yoxdur” iddiasında israr etsələr də, Azərbaycan mövcud hərbi-siyasi vasitələrlə həll yolunun alternativlərin ən yaxşısı olduğunu sübut etdi. “Status-kvo” Azərbaycan Ali Baş Komandanının iradəsi ilə, məhz hərbi-siyasi yolla, xalqımızın həmrəyliyi, dövlət-xalq birliyi və əlbəttə, Azərbaycan əsgərinin şücaəti sayəsində dəyişdirilib. Biz deyəndə ki, BMT-nin Təhlükəsizlik Şurasının qətnamələrinə, ATƏT-in qərarlarına, digər beynəlxalq təşkilatların qərarlarına hörmət edin, siyasi lallıq, korluq və karlıqdan başqa bir “cavab” görmədik. Biz vurğulayanda ki, Minsk qrupunun həmsədr ölkələri BMT Təhlükəsizlik Şurasının daimi üzvüdür, Ermənistan qoşunlarının çıxarılmasını tələb edən 4 qətnamənin icrası onlar üçün vacib olmalıdır, diplomatik susqunluqdan başqa bir “cavab” görmədik. Deyəndə ki, beynəlxalq vasitəçi olan ölkələrin hər biri öz imkanlarından, potensialından istifadə edərək Ermənistana ciddi sanksiyalar tətbiq edə bilər, ən azı, Ermənistanı işğal etdiyi əraziləri tərk etməyə çağıra bilər, ancaq siyasi kələf gördük, minbir aldatmaca ilə qarşılaşdıq. “Heç olmazsa, işğalçı nəzarət etdiyi ərazilərin kiçik hissəsindən çıxsın, bu da danışıqlar yoluna inamı gücləndirsin” - “cavab” = “0”... Buradan hansı nəticə əldə edirik? - Münaqişənin dondurulması, daha doğrusu, dondurulmuş kimi görünməsi vasitəçiləri qane edib.
Beləliklə, Minsk qrupunun mandatının gələcəyi tam şübhəlidir və Azərbaycanla mütləq razılaşdırılmalıdır.
Belə bir məşhur deyim var: Qalibləri mühakimə etmirlər. Biz qalibik. Biz öz qalib mövqeyimizdə belə mühakimədən daha çox mükaliməyə üstünlük veririk. Biz əsl qalib duruşu ilə saxta “qalib ədası”nın fərqini nümayiş etdiririk. Biz Azərbaycanıq!”.
Bölmənin digər xəbərləri
