Qlobal iqtisadiyyatın 41 faizi sıfır karbon emissiyalı olacaq
Bakı, 2 noyabr, AZƏRTAC
Qlobal ümumi daxili məhsulun (ÜDM) 41 faizini formalaşdıran ölkələr karbon emissiyalarını sıfıra endirmək üçün hədəflərini müəyyənləşdirib.
AZƏRTAC xəbər verir ki, qlobal ÜDM-in 41 faizi və karbon emissiyalarının isə 44 faizini formalaşdıran Koreya Respublikası, Yaponiya, Çin, Avropa ittifaqı və Böyük Britaniya karbon emissiyalarını sıfıra endirməklə bağlı hədəflərini açıqlayıb. Beləliklə də, ənənəvi enerji mənbələrindən bərpaolunan enerji mənbələrinə keçid sürətlənəcək.
Çin kimi qlobal karbon emissiyalarının 30 faizinə malik ölkələr üçün bu hədəfləri yerinə yetirmək Avropa ölkələri qədər asan olmayacaq. Lakin ən azı bir hədəf qoyulub, bu istiqamətdə görülən işlər mühüm bir addım hesab olunur.
Digər tərəfdən isə ABŞ hələ də karbon emissiyalarını sıfıra endirməklə bağlı hədəf müəyyən etməyib. Co Baydenin prezident seçiləcəyi təqdirdə 2050-ci ilə qədər 100 faiz təmiz enerji və sıfır karbon emissiyası hədəflərinin müəyyən ediləcəyi gözlənilir.
Paris razılaşmasına görə, 2050-ci ilə qədər sıfır karbon emissiyası hədəfinə çatmaq üçün 2030-cu ildə karbon emissiyaları 45 faiz azaldılmalıdır.
197 ölkədən 190-nı rəsmi olaraq Paris sazişini imzalasa da, ölkələrin qoyduğu hədəflərin çoxu hələ də qeyri-kafidir və anlaşmanın məqsədləri ilə uyğun gəlmir.
Qeyd edək ki, 2019-cu ildə qlobal karbon emissiyalarının 67 faizi Rusiya, Yaponiya, Hindistan, Avropa İttifaqı və Çinin payına düşüb.
Bölmənin digər xəbərləri
