Qobustanın Çuxanlı kənd məktəbi üçün yeni binanın inşasına başlanılmışdır
Qobustan, 3 noyabr (AZƏRTAC). Qobustan rayonunun Çuxanlı kəndində 180 şagird yerlik tam orta məktəb üçün yeni tədris ocağının tikintisinə başlanılmışdır.
AZƏRTAC xəbər verir ki, Təhsil Nazirliyinin sifarişi ilə inşa olunan yeni məktəb binası kənddə tədrisin yüksək səviyyədə təşkilinə imkan verəcəkdir. Geniş və işıqlı sinif otaqları, fənn kabinetləri, kitabxana, iclas, qış idman zalları və s. pedaqoji və şagird kollektivlərinin sərəncamında olacaqdır. Yeni bina müasir istilik sistemi ilə də təchiz ediləcəkdir. Tədris ocağının gələn dərs ilinədək istifadəyə verilməsi nəzərdə tutulmuşdur.
Son 10 ildə rayonda ümumtəhsil məktəblərinin maddi-texniki bazasının yeniləşdirilməsi, tədrisin səviyyəsinin yüksəldilməsi istiqamətində ardıcıl işlər görülür. Bu müddətdə təkcə 13 yeni məktəb binası tikilib istifadəyə verilmişdir. Hazırda daha 2 kənd məktəbi üçün təzə bina inşa olunur.
Bölmənin digər xəbərləri
