Quba-Xaçmaz bölgəsi çaylarında suyun səviyyəsi artmışdır
Bakı, 21 iyun (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti çayların sululuğu ilə bağlı apardığı araşdırmanın nəticələrini açıqlamışdır.
Nazirliyin mətbuat xidmətindən AZƏRTAC-a bildirmişlər ki, araşdırmaya görə, bəzi yerlərdə yağan leysan xarakterli yağışlar nəticəsində respublikanın əsasən Quba-Xaçmaz bölgəsi çaylarında suyun səviyyəsi 10-100 santimetr artmışdır. Hazırda Böyük Qafqazın Quba-Xaçmaz bölgəsi çaylarında sululuq ongünlük normanın 30-200, Kiçik Qafqaz çaylarında 80-90, Lənkəran-Astara bölgəsi çaylarında 60-80, Naxçıvan MR çaylarında isə 30 faizini təşkil edir.
İyunun 21-də Kür çayının Qıraqkəsəmən məntəqəsində suyun səviyyəsinin 23 santimetr azaldığı, su sərfinin saniyədə 167 kubmetr olduğu qeydə alınmışdır. Qanıx çayının Əyriçay məntəqəsində isə suyun səviyyəsində 52 santimetr artım müşahidə olunmuşdur. Məntəqədə su sərfi saniyədə 144 kubmetr təşkil etmişdir.
Kür çayının aşağı axınında suyun səviyyəsində əsasən azalma müşahidə olunmuşdur.
Kür çayının Surra məntəqəsində suyun səviyyəsinin 358, Şirvanda 213, Salyanda 170, Bankədə 235, Araz çayının Novruzlu məntəqəsində isə 70 santimetr olduğu müəyyən edilmişdir.
Bölmənin digər xəbərləri
