İDMAN
Qurban Qurbanov: "Qəbələ"nin çox sürətli əks-hücumları var
Bakı, 20 aprel, Nicat Məmmədov, AZƏRTAC
Kubok oyunu çempionat matçından fərqli olur. Burada komandalar daha istəkli oynayırlar. Çünki cütün taleyi iki oyundan ibarətdir.
AZƏRTAC xəbər verir ki, bunu "Qarabağ"ın baş məşqçisi Qurban Qurbanov "Qəbələ"yə 3:1 hesabı ilə qalib gəldikləri Azərbaycan Kubokunun yarımfinal mərhələsinin ilk oyunundan sonra deyib.
Əlli yaşlı mütəxəssis texniki səhvdən sonra qol buraxdıqlarını bildirib: "3:1 hesablı qələbə qazansaq da, futbolçular əziyyət çəkdilər. Komandamdan razı qaldım, çünki sona qədər qələbə üçün oynadılar".
Təcrübəli baş məşqçi rəqibin hesabı açmasına təəccüblənmədiyini söyləyib: "Onların əvvəlki matçlarını da izləmişəm. Mübarizəyə görə, bəlkə də, çox oyunda məğlubiyyətə layiq deyildilər. Çox sürətli əks-hücumları var. “Qəbələ” istənilən an qol vurmağı bacaran komandadır. Bu gün qol buraxmağımızı istəmirdim. Amma yekunda qələbə qazanmağımıza görə şadam".
Qurbanov həm Premyer Liqanın növbəti turunda, həm də kubokun cavab qarşılaşmasında ardıcıl “Qəbələ” ilə qarşılaşmalarına da münasibət bildirib: “Futbolçunun ən çox xoşlamadığı bir proqram eyni rəqibə qarşı ardıcıl 3 dəfə oynamaqdır. Bu, oyunçu üçün xoş hal deyil. Bəlkə də, son illər belə halla üzləşməmişdik. Səfərdə qalıb, daha bir matçı burada keçirəcəyik. Yenə də yaxşı hazırlaşmağa çalışacağıq ki, növbəti oyunlarda da uğurlu çıxış edək".
Mütəxəssis “qızıl dubl” arzusunda olduqlarını gizlətməyib: “Hər il hər turnirdə maksimum yaxşı nəticə göstərmək istəyirik. Son neçə ildə bu alınmırdı. Bu mövsüm şansımız var, bundan istifadə etməyə çalışacağıq. Qarşıda hələ cavab oyunu var, çempionat da davam edir. Bəli, şanslarımız var. Bu il hər iki turnirin qalibi olsaq, buna sevinərik. Bunu nə dərəcədə bacaracağıq, qarşıdakı oyunlar göstərəcək”.
Baş məşqçi Patrik Andradenin müqaviləsini uzatmaq üçün klubdan böyük məbləğ tələb etməsi ilə bağlı iddialara da cavab verib: "Patriklə danışıqlar gedir. Onun klubla müqaviləsi iyunda bitir. Hər futbolçu öz oyununu yaxşılaşdırdığı kimi, yaşam tərzini də yaxşılaşdırmaq istəyir. Ona görə də bu məsələyə normal yanaşıram. Ola bilər ki, daha çox üzdə olub, təklifləri çoxdur. Belə düşüncəsi ola bilər. Hər halda burada qlobal problem görmürəm. Onunla dost kimi danışıq gedir. Düşünürəm ki, yaxşı olar. Hər zaman çalışırıq ki, kim nəyə layiqdirsə, ona qarşılığını verək”.
"Qəbələ"nin baş məşqçisi Elmar Baxşıyev: "Bizi ağır oyunun gözlədiyini bilirdik. Rəqib çempionatımızın favoritidir. Komandam meydanda əlindən gələnin ən yaxşısını etməyə çalışdı. Sonuncu qoldakı epizoda gəlincə, ötən tur "Sumqayıt"la oyunda bizim lehimizə penalti verilməli idi. O, daha çox 11 metrlik cərimə zərbəsinə oxşayırdı, nəinki bu. Məncə, matçın qırılma nöqtəsi sonuncu dəqiqələrdə verilən qərar idi. Düşünürəm ki, orada penalti yox idi. Bizə qarşı bir az fərqli yanaşırlar. Bizim qapımıza dərhal penalti verirlər. Hansı ki, biz istədiyimiz epizodlara isə başqa cür yanaşırlar. Turnirdən qopmayacağıq. Mən bu komandaya inanıram. Heyəti yığanda hamı fikirləşirdi ki, 7 və ya 8-ci yeri tutacağıq. Amma komandamız sağlamdır, heyətdəki futbolçular daha yaxşı nəticəyə qadirdirlər".
Baxşıyev mövsümün əvvəlində avrokuboklara vəsiqə qazanmaq barədə düşünmədiklərini söyləyib: "Hər zaman növbəti oyunu düşünürük. Qismətdə varsa, vəsiqə qazanacağıq. Bizim hamımızda iddia var. Amma o iddia ilə alışıb yanmırıq. İşimizi elə qurmuşuq ki, qarşıdakı rəqibi fikirləşirik.