QUŞ ƏTİNDƏN İSTİFADƏYƏBAYTAR NƏZARƏTİ GÜCLƏNDİRİLİB

16.01.2006 [19:09]
Çap et
A⁺ A^-

Qax rayon İcra Hakimiyyətində “quş qripi” xəstəliyinin yayılması təhlükəsinin aradan qaldırılması məqsədi ilə aparılan profilaktik tədbirlərə həsr olunmuş operativ müşavirə keçirilmişdir. Müşavirədə rayon baytarlıq xidmətinin, ərazi icra nümayəndəliklərinin və yerli bələdiyyələrin, hüquq mühafizə orqanlarının rəhbərləri, kənd təsərrüfatı və ekologiya üzrə mütəxəssislər iştirak etmişdir.

İcra hakimiyyətindən AZƏRTAC-ın müxbirinə bildirmişlər ki, müşavirədə insan həyatı üçün olduqca təhlükəli hesab olunan bu qorxulu xəstəliyin rayon ərazisində yayılmasının qarşısını almaq məqsədi ilə qonşu dövlətlərlə həmsərhəd olan yaşayış məntəqələrində, habelə kəndli-fermer təsərrüfatlarında və quşçuluq müəssisələrində gücləndirilmiş iş rejiminə keçilməsi ilə bağlı əlaqədar qurumların rəhbərlərinə konkret tapşırıqlar verilmiş, əhali arasında geniş izahat işinin aparılmasının vacibliyinə toxunulmuşdur. Tövsiyə olunmuşdur ki, rayon ərazisində qışlayan çöl quşlarının məskunlaşdığı ərazilər müəyyənləşdirilməklə, həmin sahələr daim nəzarətdə saxlanılsın, vəhşi quşların ovlanması, habelə küçə və yol kənarlarında ət məhsulları və ev quşlarının satışı qadağan olunsun, iaşə obyektlərində quş ətindən qida məhsulu kimi istifadə edilməsi ciddi nəzarətə götürülsün.

Analoji müşavirələr Şəki-Zaqatala bölgəsinin digər rayonlarında da keçirilmişdir.