Quş təsərrüfatının sahibi: Qazaxıstan, Qırğızıstan və Özbəkistandan sifariş verirlər VİDEO
Biləsuvar, 22 aprel, İsmayıl Cəfərli, AZƏRTAC
Biləsuvar rayon sakini Rafiq Muradovun həyətində yaratdığı quş təsərrüfatı kiçik zooparkı xatırladır.
AZƏRTAC xəbər verir ki, təsərrüfatda dünyanın müxtəlif yerlərindən gətirilmiş dekorativ və çöl quşları saxlanılır. Bunlara yava və kameo tovuzquşuları, xınalı və ağ kəkliklər, zümrüd, gümüşü və Nepal qırqovulları, eləcə də ABŞ, İndoneziya, Almaniya və Hindistanda yetişdirilmiş ev quşları daxildir.
Rafiq Muradov deyir ki, 8 il əvvəl hobbi kimi quş saxlamağa başlayıb. Sonra təsərrüfat yaradıb. İndi isə həmin təsərrüfat bölgədə sakinlərin və turistlərin marağına səbəb olan kiçik zooparka çevrilib. “Təsərrüfatda növbənöv quşlar var, çoxu xaricdən gətirilib”, - deyə o əlavə edib.
Təsərrüfat sahibi bəslədiyi quşların satışını da həyata keçirir. Yerli və xarici alıcılardan sifarişlər əsasən, internet üzərindən qəbul edilir. Quşların qiyməti növündən asılı olaraq 200-2000, yumurtanın bir ədədinin qiyməti isə 10-50 manat arasında dəyişir: “Azərbaycanda bizi tanıyırlar. Xaricdən də sifarişlər alırıq. Qazaxıstan, Qırğızıstan və Özbəkistandan quş almaq istəyənlər bizə sifariş verirlər. Rusiya, Türkiyə, Özbəkistan, Gürcüstan və Belarusa quşların yumurtalarını göndəririk”.
Rafiq Muradovun təsərrüfatı həm də məktəblilər üçün ekskursiya yeridir. Onlar buraya gələrək müxtəlif quşlar barədə məlumat alırlar. Mütəxəssislər isə bildirirlər ki, təsərrüfat bölgədə ekoturizmin inkişafı baxımından diqqəti cəlb edir, regionda bu sahədə imkanların olduğunu göstərir.
Qeyd edək ki, sahibkar təsərrüfatını daha da genişləndirmək fikrindədir.
Bölmənin digər xəbərləri
