QUZANLI QƏSƏBƏSİNƏ TƏBİİ QAZ VERİLMİŞDİR
AZƏRTAC xəbər verir ki, oktyabrın 4-də Azərbaycan Prezidenti İlham Əliyev Ağdam rayonunun Quzanlı qəsəbəsinə təbii qazın verilməsi ilə əlaqədar keçirilən mərasimdə iştirak etmişdir.
Dövlətimizin başçısı Quzanlı qəsəbəsinin qaz təchizatı sxemi ilə tanış oldu. “Azəriqaz” Qapalı Səhmdar Cəmiyyətinin sədri Əlixan Məlikov məlumat verdi ki, əhalinin sosial vəziyyətinin yaxşılaşdırılması istiqamətində görülən ardıcıl tədbirlərin davamı olaraq, Quzanlı qəsəbəsinə 16,6 kilometr uzunluğunda qaz kəməri çəkilmişdir. Vaxtilə Ağdam-Quzanlı qaz kəməri vasitəsilə qazdan istifadə edən qəsəbə Qarabağ müharibəsi nəticəsində 15 il bundan əvvəl bu təbii yanacaqdan məhrum olmuşdu. Ölkə başçısının tapşırığı ilə bu ilin avqust ayından “Azəriqaz” QSC tərəfindən başlanan tikinti-quraşdırma işlərinin ilkin mərhələsi qısa müddətdə tamamlanmışdır. Başlanğıcını Bərdə-Ağcabədi magistral qaz xəttindən götürən kəmər 200 millimetrlik borulardan ibarətdir. Həmin polietilen borular ölkəmizdə istehsal olunur. Bu kəmər Quzanlı qəsəbəsində 450 abonentin qazla təminatına imkan verəcəkdir. Qəsəbə daxilində 27 kilometr uzunluğunda müxtəlif diametrli qaz xətləri çəkilmişdir. Burada 384 mənzil təbii qazla təmin edilmişdir. Abonentlərdən 174-ü məcburi köçkündür. Qaz verilən bütün evlərdə sayğaclar quraşdırılmış və “Beko” markalı qaz sobası qoyulmuşdur. Bu işlərin görülməsinə dövlət büdcəsindən 1 milyon 300 min manat vəsait ayrılmışdır. 2009-cu ildə həyata keçiriləcək ikinci mərhələdə Quzanlı qəsəbəsi və Çullu kəndi ilə yanaşı, yeni salınan Quzanlı-1, habelə İmamqulubəyli və Qasımbəyli kəndlərində yeni salınmış qəsəbələrdə 2916 abonentə qaz veriləcəkdir.
Prezident İlham Əliyev Quzanlıya təbii qaz verilməsinin rəmzi olan məşəli alovlandırdı.
Sonra bu münasibətlə mərasim keçirildi.
Dövlətimizin başçısı mərasimdə nitq söylədi.
######
 |
 |
Bölmənin digər xəbərləri
