Rafael Ağayev: Zədəli olarkən dünya və Avropa çempionatlarını televiziyadan göz yaşları ilə izləyirdim
Bakı, 28 fevral, AZƏRTAC
“Valideynləri gənclərə seçdikləri idman növündən asılı olmayaraq, hər zaman dəstək göstərməlidirlər. Uşağın idmana həvəsini artırmaq üçün məşqçi ilə yanaşı, valideyn də kömək etməlidir. Bütün gənclərimizə uzun və sağlam ömür arzulayıram. Diləyirəm ki, hər zaman pis vərdişlərdən uzaq olsunlar”.
Bu sözləri AZƏRTAC-a açıqlamasında Azərbaycanın karate üzrə 5 qat dünya, 11 qat Avropa çempionu Rafael Ağayev deyib.
Tokio Olimpiadasının gümüş mükafatçısının sözlərinə görə, yaxşı nəticələr və titullar əldə etmək üçün ilk növbədə idmanı sevmək lazımdır: “Peşəkar idmançı məşqlərini hər zaman düzgün formada yerinə yetirməli, verilən tapşırıqlara ciddi yanaşmalı və hazırlıqlardan yayınmamalıdır. Milli komandanın məşqçi heyəti ilə mehriban olmalıdır. Bir sözlə, bir-birilərini başa düşməlidirlər. Məşqçi ilə idmançı arasında olan bağ ana ilə bala arasındakı kimi olmalıdır. Ən əsası, uğur qazandıqdan sonra xarakter olaraq dəyişməməlidir. Sevincini içində boğa, xalqla və ya onu sevənlərlə paylaşa bilər. Sözsüz ki, Azərbaycan xalqı hər bir idmançının uğurlarına sevinir. Bu, əzəldən belə olub. Gənclər isə ilk növbədə valideynlərinin sözlərinə qulaq asmalıdırlar. Bundan başqa, idmançının orta məktəbdə biliyi zəif olsa belə, tərbiyəsi yerində olmalıdır. Tərbiyə də ailədən gəlir”.
R.Ağayev idman uğrunda bir çox şeyi qurban verdiyini söyləyib: “Hər idmançının fərqli həyat tərzi və karyerası olur. Təbii ki, oxşarlıqlar da ola bilər. Amma mən özüm bu gün bu səviyyədə ola bilmək üçün çox şeyləri qurban vermişəm. Müəyyən müddət zədələrdən əziyyət çəkmişəm. Hətta 2013 və 2014-cü illərdə zədələr üzündən dünya və Avropa çempionatlarını buraxmaq məcburiyyətində qalanda bu turnirləri televiziyadan göz yaşları ilə izləyirdim. Yalnız azərbaycanlı deyil, Türkiyədən olan həkimlər də artıq karyeramın bitdiyini söyləyirdilər. Normal insanın bu travmalarla davam edə bilməyəcəyini demişdilər. Amma şükürlər olsun ki, sonradan özümü toparladım. Türkiyəli həkimlər məni ayağa qaldırdılar. Onlara minnətdaram. Bir çox şeyi qurban verərək yenidən idmana qayıtdım. Demək olar ki, sıfırdan başladım. Bu, heç də asan olmadı. Çətinliklə bu mərhələləri adladım və nailiyyətlər əldə etdim. 5 dəfə dünya, 11 dəfə Avropa çempionatının və iştirak etdiyim bir çox turnirin qalibi olmuşam. Avropa və İslam Həmrəyliyi Oyunlarında medallar qazanmışam. Həmçinin “Tokio-2020” Yay Olimpiya Oyunlarının gümüş mükafatçısıyam. Sözsüz ki, Olimpiadada fəxri kürsünün ən yüksək pilləsinə qalxmaq istərdim. Amma həyat sürprizlərlə doludur. Deməli, qismət belə imiş. Olimpiadadan sonra “Karate Kombat”da gücümü sınamağa başladım. Bu, tamamilə karate idmanından fərqlidir. Bəzi məşhur idmançılar burada döyüşə bilməyəcəklərini dedilər. Amma mən bütün müsahibələrimdə uşaqlıqdan döyüşməyə çox meyilli olduğumu söyləmişəm. Həmişə dəcəl idim. Bilirdim ki, bacarmaq üçün gücüm var. Beləliklə, MMA məşqlərinə başladım və orta çəkidə dünya çempionu kəmərinin sahibi oldum, həmin kəməri bir dəfə qorudum”.
Karate ustası “dünyaya ikinci R.Ağayev gələcəkmi?” sualına isə belə cavab verib: “Həyatda hər şey mümkündür. Şübhəsiz, Allah məndən güclüsünü də yaradacaq. Allahın işinə qarışmaq olmaz. Amma əminliklə deyə bilərəm ki, ən azı 17-18 il ərzində mənim uğurlarımı təkrarlaya biləcək idmançı dünyaya gəlməyəcək”.
Bölmənin digər xəbərləri
