AZƏRTAC xəbər verir ki, oktyabrın 7-də Olimpiya-İdman Kompleksinin açılışından sonra Prezident İlham Əliyev Biləsuvar rayonu ictimaiyyətinin nümayəndələri ilə görüşmüşdür.

4 nömrəli şəhər orta məktəbinin müəllimi, Rayon Ziyalılar Cəmiyyətinin sədri SAHİBƏLİ MİRZƏYEV dövlətimizin başçısına müraciətlə dedi:

- Cənab Prezident, bizim Biləsuvar şəhərinə xoş gəlmisiniz, səfa gətirmisiniz. Qədəmləriniz mübarək olsun!

Biləsuvar camaatı Sizi həmişə səbirsizliklə, intizarla gözləmişdir. Şükürlər olsun ki, bu gün Siz Biləsuvar torpağındasınız, bizimlə bir yerdəsiniz. Bu, bizi çox şad etdi. Biləsuvarlılar indi sevinc içərisindədirlər və Sizi salamlamağa da həmişə şaddırlar.

Siz Prezident olduğunuz dövrdə bütün fəaliyyətinizi respublikamızın sosial-iqtisadi inkişafına, tərəqqisinə sərf etmisiniz. Bunun sayəsində Azərbaycan dünyada tanınmış bir dövlətə çevrilibdir. İndi Azərbaycanın bütün dünyada imici var, ad-sanı var, Azərbaycanla hesablaşırlar. Elə bir problem, məsələ yoxdur ki, - istər regional məsələ, istər dünya məsələsi olsun, - Azərbaycanın sözü eşidilməsin və Sizin fikriniz, rəyiniz nəzərə alınmasın. Bu, bizim hamımızı çox şad edir. Ona görə də respublikamızın gələcəyi naminə Sizə uzun ömür, cansağlığı arzu edirik.

Cənab Prezident, Siz xalqın rifahı naminə öhdənizə çox böyük vəzifələr götürmüşdünüz - 600 min yeni iş yerinin açılması, regionların sosial-iqtisadi inkişafının təmin olunması, yoxsulluğun minimum həddə endirilməsi. Ən başlıcası isə, hər bir vətəndaşın Prezidenti olacağınıza söz vermişdiniz. Şükürlər olsun ki, bu, indi həyatda öz əksini tapıbdır. Ancaq bunlar çətin məsələlər idi. Bunu hamı qəbul edə bilmirdi. Buna şübhə ilə yanaşanlar, hətta onu qəbul etməyənlər də tapılmışdı. Amma Siz bir Prezident kimi nə edəcəyinizi bilirdiniz. Siz realist Prezidentsiniz. Ona görə də nə edəcəyinizi bilirdiniz və çox şükürlər olsun ki, qarşıya qoyduğunuz problem məsələlərin hamısı yüz faiz, hətta artıqlaması ilə yerinə yetirilmişdir. Bu, bizim hamımızı çox şad edir.

Cənab Prezident, Siz 2006-cı ilin avqust ayında Biləsuvarda olmuşdunuz. Onda Biləsuvarın sosial-iqtisadi inkişafını vurğulamış və gələcəkdə də rayonun inkişafına yardım göstərəcəyinizə söz vermişdiniz. İndi şükürlər olsun, bizim Biləsuvar şəhərini tanımaq mümkün deyildir. Mənim 70 yaşım var. Burada doğulmuşam, burada da yaşayıram, sadə bir müəlliməm. Ancaq bu tərəqqi məni heyran etməyə bilmir. Bizim Biləsuvar şəhərində belə bir tərəqqi olmamışdır. O da Sizin xidmətinizin, fədakar əməyinizin nəticəsidir. Siz xalqımızın yolunda fədakarlıq göstərirsiniz. Bunu qiymətləndirmək lazımdır, xalqımız bunu edir və Sizi çox sevir. Sizin qədər işləyən Prezident yoxdur və bu, bizim fəxrimizdir.

Biz Sizinlə bütün dünyada fəxr edirik. Siz beynəlxalq aləmə çıxanda Sizinlə fəxr edirik. Belə Prezident bizə lazımdır, xalqımızın Sizə ehtiyacı var. Biz həmişə bu ehtiyacı hiss etmişik. Bizə həmişə qayğı göstərmisiniz.

Bizim Biləsuvar şəhərində gedən tərəqqi, inkişaf göz qabağındadır. Burada böyük süd zavodu istifadəyə verildi. Bu, iqtisadi inkişafın təzahürüdür. Məktəb-lisey açılıbdır. Bu da xalqa, xalqın balalarına göstərdiyiniz qayğının təzahürüdür.

Nə qədər binalar, nə qədər sosial obyektlər tikilib, istirahət parkları salınıbdır. Heydər Əliyevin adını daşıyan istirahət parkımız respublikada ən gözəl, nümunəvi parklardan biridir. Bunlar hamısı Sizin xidmətlərinizdir.

Cənab Prezident, bizim rayonun, demək olar ki, ehtiyacı təmin olunubdur. İnsanların rifah halı yaxşılaşıb, real gəlirləri artıb, əmək haqqı dəfələrlə artıbdır. Kənd təsərrüfatı işçilərimiz, necə deyərlər, xarüqələr yaradırlar. Bizim işıq problemimiz, qaz problemimiz də yoxdur. Əgər mümkünsə, bizim Biləsuvar əhalisinin bir arzu və istəyini Sizə çatdırmaq istəyirəm.

İLHAM ƏLİYEV: Buyurun.

SAHİBƏLİ MİRZƏYEV: Biləsuvar aqrar rayondur. Burada pambıqçılıq, taxılçılıq, maldarlıq geniş yayılıb və son vaxtlarda bu sahələrdə böyük tərəqqi əldə edilibdir. Ancaq su problemi meydana çıxıbdır. Biləsuvar rayonu, demək olar ki, bütünlüklə mexaniki suvarma üsuluna əsaslanır. Ona görə bu, Biləsuvar camaatının arzusudur və mən bunu Sizə çatdırıram. Camaatımız adından xahiş edərdim ki, imkan daxilində bizim rayona bu məsələdə kömək göstərəsiniz.

Cənab Prezident, Siz həqiqətən xarüqələr yaradırsınız. Milli Məclisin deputatı, Heydər Əliyev Fondunun prezidenti, Azərbaycanın birinci xanımı, - mən deyərdim ki, xanımlar xanımı - Mehriban xanıma da öz səmimi təşəkkürümüzü bildiririk. Çünki burada nə qədər məktəb tikilib, nə qədər məktəb yenidən qurulubdur. Mən 4 nömrəli məktəbdə işləyirəm. Bu məktəb müasir tələblərə cavab verən qaydada yenidən qurulubdur. İndi adam binaya girəndə ruh yüksəkliyi hiss edir. Bu, bizim gənclərimizə Sizin qayğınızdır. Qarşısında durduğumuz idman kompleksi də həmçinin. Respublikada başdan-başa idman kompleksləri tikilir. İndi bizim rayonda da var. Buna görə də Sizə çox minnətdarıq. Bu, bizim gənclərimizə çox böyük qayğıdır. Bizim gənclərimizin, idmançılarımızın səsi dünya miqyasından gəlir. Tokiodan, Çindən, Afinadan gəlir. Müxtəlif yarışlarda idmançılarımız çox böyük uğurlar qazanırlar. Bu, Sizin xidmətinizdir. Xüsusilə müəllimlərə çox diqqət yetirirsiniz. Allah Sizə ömür versin, cansağlığı versin. Azərbaycanın səadəti naminə Sizə uzun ömür, cansağlığı arzulayırıq.

İLHAM ƏLİYEV: Xoş sözlərinizə görə çox sağ olun. Mən çox şadam ki, son illər Biləsuvarda işlər çox yaxşı gedir. Siz qeyd etdiniz, iki il bundan əvvəl mən gəlmişdim. Xatırlayırsınız, ondan əvvəlki dövrdə, 2003-cü ildə və ondan sonra da Biləsuvarda dəfələrlə olmuşam. Burada bu gün gördüyümüz binaların heç biri yox idi. İki il ərzində bu gözəl Olimpiya-İdman Kompleksi tikilibdir və bu gün açılışını qeyd etdik. Bizimlə üzbəüzdə ən müasir məktəb tikilibdir. Ən qabaqcıl texnologiyalarla təchiz edilmiş və memarlığı ilə fərqlənən gözəl məktəbdir. Siz qeyd etdiniz, bu gün mən süd zavodunun açılışında iştirak etdim, nadir bir zavoddur. İlk dəfədir ki, Azərbaycanda quru süd istehsal edən zavod tikilibdir. Demək istəyirəm ki, həm Azərbaycanın müxtəlif bölgələrində, həm də regionun başqa ölkələrində süd zavodları var. Amma quru süd istehsal edən zavod bir dənədir. Bu zavod Azərbaycanın bütün tələbatını təmin edəcək və eyni zamanda çox gözəl və böyük ixrac potensialına da malikdir. Bu, Azərbaycanda ərzaq təhlükəsizliyinin təmin olunması üçün çox mühüm bir addımdır. Onu göstərir ki, həm yerli, həm də xarici investorlar, iş adamları Azərbaycana çox böyük həvəslə vəsait qoyurlar. Çox sevindirici hal odur ki, indi yerli investorlar daha fəaldırlar.

Azərbaycanda investisiya qoyuluşunun həcminə baxsaq görərik ki, daxili investisiyalar böyük fərqlə xarici investisiyaları üstələyir. Nəyin hesabına? Çünki həm dövlət siyasəti düzgün aparılır, həm iş adamlarına şərait yaradılır. Biznesin inkişafı üçün yaxşı imkanlar var və insanlarımızın alıcılıq qabiliyyəti artır. Bunun da müxtəlif səbəbləri var, o cümlədən, siz qeyd etdiyiniz kimi, maaşların artırılması, biznes üçün yaxşı şəraitin yaradılması. Azərbaycan indi biznes aparmaq üçün bir nömrəli islahatçı dövlətdir. Bunu Dünya Bankı bəyan etmişdir. Yəni bütün bu amillər bizi gücləndirir. Ölkəmiz güclənir, rayonlarda inkişaf gedir, regionların sosial-iqtisadi inkişafı Dövlət proqramının icrası demək olar ki, başa çatıbdır. Beş il üçün nəzərdə tutulmuş bütün məsələlər öz həllini tapıbdır. Siz bunu Biləsuvar rayonunun timsalında görürsünüz. Nəinki burada, bütün başqa rayonlarda böyük inkişaf, böyük tərəqqi, böyük irəliləyiş var. İnfrastruktur layihələri icra olunur, sosial məsələlər həll edilir, iş adamları üçün şərait yaradılır.

Bax, yəqin siz də bilirsiniz, indi Bakıdan Biləsuvara və Astaraya qədər yeni yol çəkilir və o yolun təxminən 20-30 kilometri hazırdır. Hamı da görür ki, nə gözəl yoldur, dünyanın ən yüksək standartlarına cavab verən yoldur. İnsanlara rahatlıq gətirəcək, biznesin inkişafına daha da böyük təkan verəcəkdir. İndi bizi bütün istiqamətlərdə başqa ölkələrlə birləşdirən yollar tikilir. Bu, infrastrukturdur, bunu dövlət edir. Elektrik stansiyalarını dövlət yaradır. Biznesin inkişafı üçün, insanların yaşaması üçün bütün başqa şəraiti dövlət yaradır. O cümlədən məktəb tikintisini qeyd etdiniz, siz müəllimsiniz. Burada son illər ərzində bir neçə məktəb tikilib, təmir edilib və hamısı yaxşı təchiz olunubdur. Növbəti illərdə də bu, nəzərdə tutulubdur. Biz bu illər ərzində 1500 yeni məktəb tikdik. Amma hələ təxminən bir o qədər də yeni məktəb tikilməlidir. Hələ köhnə, yararsız vəziyyətdə, qəzalı vəziyyətdə olan məktəblər var. Onları biz təzə binalarla əvəzləyəcəyik.

Tibb müəssisələri yaradılır, mən görmüşəm, o cümlədən Biləsuvar rayonunda tikinti gedir, yəqin ki, yaxın zamanlarda istifadəyə veriləcəkdir. Bu da yaxşı, yüksək səviyyəli tibbi xidmətin göstərilməsinə şərait yaradacaqdır.

Yəni, ilk növbədə insanlar üçün nə lazımdırsa, biz onu etməliyik və ölkəmizi iqtisadi cəhətdən inkişaf etdirmək üçün tədbirlər görüləcəkdir.

O ki qaldı, su məsələsinə, bu, doğrudan da indi nəinki burada, bütün ölkə üzrə problemlərdən biridir. Biz bu məsələnin həlli ilə məşğuluq, xüsusi proqram hazırlanıbdır. Həm içməli suyun gətirilməsi, həm meliorasiya işlərinin daha da sürətlə aparılması üçün əlavə tədbirlər görüləcəkdir. Mən göstəriş verəcəyəm ki, Biləsuvar rayonunda suvarma ilə bağlı olan problemlərin həlli üçün lazımi tədbirlər görülsün. Əgər əlavə vəsait lazım olacaqsa, bunu da biz təmin edəcəyik.

Çox yaxşı bilirəm ki, bunun son dərəcə böyük əhəmiyyəti var. Yəni biz suvarma məsələsinin həllinə nail olsaq, demək olar ki, Azərbaycanın kənd təsərrüfatı istehsalı bir neçə dəfə arta bilər.

SAKİNLƏR: Xüsusilə bu il havalar çox isti keçdi. Bizim rayonun əhalisi çox əziyyət çəkdi.

İLHAM ƏLİYEV: Bəli, təkcə burada deyil, demək olar, bütün rayonlarda bu problem var. Bu, indi əsas problemdir. Bir neçə il bundan əvvəl əsas problem işıq problemi idi. İndi bu problem tamamilə həll olundu, yoxdur. Ondan sonra qazlaşdırma problemi idi. İndi Azərbaycanın tarixində ilk dəfə olaraq, hər bir rayonda qaz var. Düzdür, hər bir kənddə yoxdur. Amma biz qazlaşdırmanı davam etdirəcəyik. İndi ən vacib məsələlərdən biri içməli su, bir də ki, suvarma suyudur. Bunlarla biz məşğul olacağıq və mən düşünürəm ki, növbəti 2-3 il ərzində bu problem tamamilə aradan qaldırılmalıdır. Tamamilə aradan qaldırılacaq, yəni ki, biz bunu yarımçıq formada etmək istəmirik. İndi müxtəlif tədbirlər görülübdür. Məsələn, Kür çayından gələn suyun təmizlənməsi üçün Biləsuvar rayonunda da xüsusi qurğular qoyulubdur. İnsanlar əvvəllər o suyu dədə-baba üsulu ilə duruldur, təmizləyirdilər. İndi müasir qurğular tikilibdir və təmiz su gəlir. Bu proses davam etdiriləcəkdir. Biləsuvar rayonunun inkişafına aid olan bütün başqa məsələlər öz həllini tapacaqdır.

Son bir neçə il ərzindəki bu tərəqqi, bu inkişaf bizim işimizin nəticəsidir. İkincisi, onu göstərir ki, hər bir məsələni biz həll edə bilərik. Elə məsələ yoxdur ki, onu həll edə bilməyək. Ölkə daxilində bütün sosial, iqtisadi və infrasturkur layihələrinin icrası uğurla gedir. Lənkəranda yeni aeroportun tikintisi başa çatıbdır. Ondan əvvəl Astarada elektrik stansiyası tikilmişdir. Bütün bunlar infrastruktur işlərinin daha da yüksək səviyyədə olmasını təmin edir. Əlbəttə ki, insanların daha da yaxşı yaşaması üçün əlavə tədbirlər görüləcəkdir.

Mən bir daha demək istəyirəm ki, iki il bundan əvvəl Biləsuvarda olmuşam və indi çox böyük dəyişiklikləri gördüm. Burada tikilən binalar yüksək səviyyədədir, dünyanın ən yüksək səviyyəsindədir. Belə də olmalıdır. Azərbaycanda yaradılan bütün yeni obyektlər ən yüksək səviyyəyə cavab verməlidir. Bizim insanlarımız ən yaxşı şəraitdə yaşamalıdırlar, ən yaxşı xidmətə malik olmalıdırlar. Mən sizi bütün gözəl nailiyyətlərlə təbrik edirəm. Gözəl Olimpiya-İdman Kompleksi, məktəb, süd zavodu - görün, bir gündə neçə gözəl tədbirin iştirakçısı olmuşuq. Sizə gələcək işlərinizdə də uğurlar və cansağlığı arzulayıram.

X X X

Sonra Prezident İlham Əliyev Biləsuvardakı Heydər Əliyev adına məktəbin direktoru GÜLMALI GÜLƏLİYEV ilə görüşdü və dedi ki, əvvəllər mən buradan keçib gedəndə həmişə məni salamlayırdınız.

GÜLMALI GÜLƏLİYEV: Cənab Prezident, çox sağ olun. Mən Heydər Əliyev əsgəriyəm, ölənə qədər ən şərəfli medal mənim ürəyimin üstündə olacaqdır.

İLHAM ƏLİYEV: Mənim yadımdadır, hələ 2000-ci ildə parlament seçkiləri ərəfəsində mən buradan cənub tərəfə gedirdim, onu yolda gördüm, o vaxt tanımırdım. Ondan sonra biz dostlaşdıq.

GÜLMALI GÜLƏLİYEV: Biləsuvar camaatı bütün işləri vicdanla yerinə yetirməyə hazıdır.

SAKİNLƏR: Cənab Prezident, bütün xalqımız kimi, biləsuvarlılar da Sizi sevir.

İLHAM ƏLİYEV: Mən də sizi çox istəyirəm və çox şadam ki, Biləsuvarda belə gözəl işlər görülür. Sizə yeni-yeni uğurlar arzulayıram. Bilin ki, mən rayonun inkişafı üçün nə lazımdırsa, həmişə onu edəcəyəm.

X X X

Sonra dövlətimizin başçısı görüş iştirakçıları ilə xatirə şəkli çəkdirdi.

Bununla da Prezident İlham Əliyevin Biləsuvar rayonuna səfəri başa çatdı.

######