“Red Bull” pit-stopun sürətinə görə rekord vurub
Bakı, 29 iyul, AZƏRTAC
Formula 1 Almaniya Qran-Prisində “Red Bull” komandası pit-stopun sürətinə görə yeni rekorda imza atıb.
AZƏRTAC xəbər verir ki, komandanın mexanikləri pilot Maks Ferstappeni bokslardan cəmi 1,88 saniyəyə buraxıblar. Nəticədə məhz Ferstappen çempion titulunu qazanıb və bu mövsümdə ikinci dəfə Qran-Prinin qalibi olub.
Həmin göstərici üzrə əvvəlki rekord da Avstriya komandasına məxsus olub. Böyük Britaniya Qran-Prisi zamanı “Red Bull” mexanikləri Pyer Qaslinin bolidinə 1,91 saniyə ərzində xidmət göstəriblər. Doğrudur, o vaxt bu komanda yürüşün qalibi ola bilməyib. Həmin mərhələni “Mercedes” komandasının britaniyalı pilotu Luis Hemilton udub.
Ən cəld pit-stopların siyahısında üçüncü yeri 1,92 saniyə nəticə ilə “Willams” komandası tutur. Azərbaycan Qran-Prisində bu komanda da pit-stopu 1,92 saniyədə həyata keçirib.
Bölmənin digər xəbərləri
