Regionlarda elm və təhsilin keyfiyyətinin yaxşılaşdırılması - konfrans
Bakı, 2 iyun, AZƏRTAC
“Konstitusiya və Suverenlik İli” çərçivəsində Elm və Təhsil Nazirliyinin akademik Həsən Əliyev adına Coğrafiya İnstitutu, Azərbaycan Coğrafiya Cəmiyyəti və Azərbaycan Dövlət Pedaqoji Universitetinin Quba filialının birgə təşkilatçılığı ilə “Regionlarda elm və təhsilin keyfiyyətinin yaxşılaşdırılması” mövzusunda bakalavr və magistrantların respublika elmi konfransı onlayn formatda keçirilib.
Bu barədə AZƏRTAC-a Coğrafiya İnstitutundan məlumat verilib.
Konfransın açılışında çıxış edən Coğrafiya İnstitutunun baş direktoru vəzifəsini icra edən dosent Zaur İmrani bildirib ki, konfransın əsas məqsədi elm və təhsilin inteqrasiyası ilə yanaşı, gənc tədqiqatçılara öz elmi nəticələrini təqdim etmək üçün platforma yaratmaq, gənclər arasında elmi dialoqu təşviq etmək, regionlarda elmi mühitin inkişafına dəstək verməkdir.
Konfransda ölkənin müxtəlif ali təhsil müəssisələrindən 50-dək gənc tədqiqatçı iştirak edib. Ondan artıq elmi istiqaməti əhatə edən məqalələr konfransın elmi gündəmini formalaşdırıb. Məruzələr əsasında dinamik elmi təqdimatlar və interaktiv müzakirələr keçirilib.
Bölmənin digər xəbərləri
