Rektor: Beşinci dəfə keçirilən beynəlxalq konfrans özünəməxsus nailiyyətləri ilə elmi ənənəyə çevrilib
Bakı, 22 iyun, AZƏRTAC
“İnternational Conferences”, “World Conferences” kimi beynəlxalq elmi platformaların daimi üzvü olan və bu il beşinci dəfə keçirilən beynəlxalq konfrans özünəməxsus nailiyyətləri ilə elmi ənənəyə çevrilib. Dünyanın aparıcı elm və təhsil müəssisələrinin tədqiqatçılarının konfransa marağının artması sevindirici haldır.
AZƏRTAC xəbər verir ki, bu barədə V İqtisadiyyat və İdarəetmə Sahəsində Tədqiqatçıların Beynəlxalq Elmi Konfransında UNEC-in rektoru Ədalət Muradov məlumat verib.
Rektor bildirib ki, V beynəlxalq konfransda Böyük Britaniya, İsveçrə, Avstriya, Macarıstan, Türkiyə, İsrail, Ukrayna, Rumıniya, Özbəkistan, Qırğızıstan və Qazaxıstan kimi ölkələrin nüfuzlu 13 universiteti tərəfdaş qismində iştirak edir.
“Konfransda 19 yerli, 94 xarici ali təhsil müəssisəsi və tədqiqat mərkəzi təmsil olunur. 44 ölkədən 678 elmi-tədqiqat işi konfransa qəbul olunub və 539 tədqiqatçı (166 xarici, 373 yerli) 80-dən çox mövzu üzrə tədqiqat nəticələrini təqdim edəcək. Tədqiqatlar əsasən “yaşıl” iqtisadiyyat, rəqəmsal iqtisadiyyat, süni intellekt, işğaldan azad olunmuş ərazilərin iqtisadiyyatı, Heydər Əliyev və ölkə iqtisadiyyatı kimi mövzuları əhatə edir. Konfransın Elm komitəsi tərəfindən seçilmiş 100-ə yaxın tədqiqat işi “Google Scholar”, “ProQuest”, “WorldCat” və digər nüfuzlu platformalarda indekslənən xarici beynəlxalq elmi jurnallarda nəşr olunacaq”, - deyə rektor bildirib.
Bölmənin digər xəbərləri
