Rəsmi Kiyev və Vaşinqton mineral ehtiyatlar sazişinin ən qısa zamanda imzalanacağını açıqladı
Kiyev, 4 mart, AZƏRTAC
Ukrayna və Amerika Birləşmiş Ştatları arasında mineral ehtiyatlar sazişi ən qısa zamanda imzalanacaq. Bununla bağlı artıq hər iki ölkə arasında qarşılıqlı anlaşma var.
AZƏRTAC xəbər verir ki, bu barədə Ukrayna Prezident Ofisi Aparatının rəhbəri Andrey Yermak teleqram sosial şəbəkə hesabında yazıb.
Onun sözlərinə görə, o, ABŞ Konqresinin Nümayəndələr Palatasının üzvü respublikaçı Brayan Fitspatriklə söhbət edib.
"Biz ədalətli sülhə doğru irəliləyiş məsələlərini və ABŞ-la mineral ehtiyatlar sazişini müzakirə etdik. Qarşılıqlı anlaşma var, biz dövlətlərimizin liderlərinin qəbul etməli olduğu qərara doğru gedirik", - deyə Yermak əlavə edib.
Respublikaçı Brayan Fitspatrik də öz növbəsində “X” sosial şəbəkəsində Yermakla təkbətək söhbət etdiyini bildirib. Tərəflər mineral ehtiyatlar üzrə sazişi müzakirə edib və onun imzalanacağını qeyd ediblər.
"Biz 100 faiz bu qatarı relslərə qaytarırıq. Mineral ehtiyatlar sazişi qısa müddətdə imzalanacaq, bu, ABŞ və Ukrayna arasında güclü, uzunmüddətli iqtisadi tərəfdaşlığa və nəticədə təbii olaraq təhlükəsizlik yardımına gətirib çıxaracaq", - deyə Fitspatrik yazıb.
Xatırladaq ki, faydalı qazıntılara dair saziş fevralın 28-də imzalanmalı idi. Lakin Ukrayna Prezidenti Volodimir Zelenski ilə ABŞ Prezidenti Donald Tramp arasında mübahisə səbəbindən imzalanma mərasimi ləğv edilib və Ukrayna lideri Ağ evi erkən tərk edib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
