Bakı, 25 yanvar, AZƏRTAC

Azərbaycan Ağır Atletika Federasiyasının (AAAF) baş katibi Rizvan Rəsulov federasiyanın saytına müsahibə verib.

AZƏRTAC AAAF-ın saytına istinadla xəbər verir ki, R.Rəsulov müsahibədə idmançılar arasında sağlam rəqabətin təmin olunması istiqamətində Beynəlxalq Olimpiya Komitəsi (BOK), Beynəlxalq Anti-Dopinq Agentliyi (WADA) və digər beynəlxalq qurumlar tərəfindən aparılan işləri təqdirəlayiq hesab edib. Bildirib ki, əsas mübarizə vasitələrindən biri də dopinq hadisələrinə qarşı diskvalifikasiya cəzalarıdır. Azərbaycan da daxil olmaqla cəzaların verildiyi digər ölkələrdə ağır atletikada islahatların aparılmasına ciddi diqqət yetirirlər. Beynəlxalq Ağır Atletika Federasiyası (IWF) milli federasiyalarla sıx ünsiyyətdə olur, onların qarşısında bir sıra vəzifələr qoyur. Bu gün dopinqlə mübarizə milli federasiyaların ana xəttini təşkil edir. AAAF bu işə ciddi münasibətini göstərir. Azərbaycan Milli Anti-Dopinq Agentliyi (AMADA) də bu məsələlərdə fəal iştirak edir. Biz bu istiqamətdə üzərimizə düşən öhdəlikləri yerinə yetirir, ağır atletikanın nəinki gələcəkdə Olimpiya ailəsindən çıxarılmasının qarşısını almaq, əksinə, daha nümunəvi idman növü olmasına töhfəmizi verməyə çalışır, onun şəffaf inkişafı üçün ciddi addımlar atırıq.

Testlərin nəticələri barədə məlumat verən R.Rəsulov bildirib ki, AMADA il ərzində yarış və qeyri-yarış şəraitində idmançılardan götürdüyü testləri beynəlxalq laboratoriyalara göndərir. Təbii ki, bu proseslərin nəticəsində bəzi idmançıların verdikləri analizlərdə qadağan olunmuş maddələr tapılır. Təqdirəlayiq hal odur ki, beynəlxalq təşkilatlar ilə yanaşı, AMADA da bu işə məsuliyyətlə yanaşır. Federasiya bu tədbirləri təbii qarşılayır, çünki belə hallarla qarşılaşan tək biz deyilik. Bir atletin yarış və ya qeyri-yarış şəraitində dopinqə düşməsi ciddi məsələdir. Lakin bu hallar bir çox idman növlərində təsadüf olunan hadisələrdir. Qadağan olunmuş preparatlardan istifadə edən idmançı həm özünə, həm təmsil olunduğu federasiyaya və ən əsası ölkəsinə ləkə gətirir. Ancaq biz dopinqlə mübarizə aparırıq və ortaya belə neqativ hallar çıxdıqda onu faciə adlandırmamalıyıq. Bu halların baş verməməsi istiqamətində ciddi islahatlar aparırıq. Lakin bu mübarizə tək federasiyanın işi olmamalıdır. Bununla idman növünün inkişafı ilə məşğul olan bütün idman təşkilatları da yaxından iştirak etməlidirlər. Yaddan çıxartmaq lazım deyil ki, kiçik yaşlarından idmanla məşğul olan idmançılar idman növünün sirlərinə idman məktəblərində və klublarda yiyələnirlər. Bu, ciddi həm fiziki, həm də psixoloji prosesdir.

Anti-dopinq istiqamətində federasiya tərəfindən görülən profilaktik tədbirlərdən danışan vitse-prezident diqqətə çatdırıb ki, ilk növbədə, idmançılar, onların məşqçiləri, mütəxəssislərlə söhbətlər aparılır, seminarlar təşkil olunur, dopinqsiz fəaliyyət üçün maksimum səy göstərilir. Bu, proses ağrılıdır, formalaşması üçün vaxt lazımdır. Ağır atletikada dopinq olmamalıdır. Ancaq əvvəlcə dopinqi bəzi insanların beynindən çıxarmaq lazımdır.

AAAF-ın AMADA ilə çox sıx əməkdaşlıq etdiyini deyən R.Rəsulov bildirib ki, ötən il istər WADA, istərsə də AMADA tərəfindən ağır atletika yığmalarımızda dəfələrlə yoxlamalar aparılıb. 2017-ci ildə AMADA tərəfindən 50 test götürülüb ki, onlardan 35-i yarışdan kənar, 15-i isə yarış vaxtı həyata keçirilib. AMADA-nın fəaliyyətini yüksək dəyərləndiririk. Yoxsa bu qədər pozuntular üzə çıxmaz, sonra yığma komandamıza daha böyük problemlər yaranar, federasiya olaraq zərbə altında qala bilərik. Qarşıda görməli olduğumuz çox iş var. Ötən ilin dekabrında IWF-dən bizə məktub daxil olmuş, müəyyən şərtlər irəli sürülmüşdü. Dekabrda Almatıda 9 ölkənin cəzalanması ilə bağlı brifinqdə də iştirak etdik, orada səsləndirilən yeni tələblər barədə məlumatlandırıldıq və bu haqda ictimaiyyətə geniş açıqlama verdik. Çox ciddi öhdəliklər götürmüşük. İlk olaraq, WADA və AMADA üçün şəffaf olmalı, onların dopinq testini rahat götürmələri üçün ən münbit şəraiti yaratmalıyıq. Əks halda cəza müddətimiz nəinki azalar, daha da artar. Ona görə də çalışırıq ki, dopinq qəbul edən atletləri tez bir zamanda özümüz ortaya çıxaraq, uzaqlaşdıraq. Lakin bunu biz tək edə bilmərik, müvafiq qurumlarla əməkdaşlıq etməliyik və edirik də. Bu, federasiyanın əzmkarlığı kimi qeyd olunmalıdır.

“Ötən il Yaponiyada keçirilən gənclər arasında dünya, Albaniyada gənclərin Avropa birinciliyində yüksək nəticələr əldə etdik. Tailandda keçirilən yeniyetmələrin dünya birinciliyində komanda hesabında 9-cu yeri tutaraq bu il Argentinada keçiriləcək Yeniyetmələrin Olimpiya Oyunlarına lisenziya qazanmaq üçün yetərli uğur qazanmışıq. Üstəlik, Kosovoda yeniyetmələrin Avropa birinciliyində medal sayında Avropa çempionu olaraq dopinqsiz uğur qazanmağın mümkünlüyünü əyani şəkildə bir daha sübut etdik. Nəticədə 2017-ci ildə yeniyetmələr və gənclər arasında Avropa birinciliklərində və ümumilikdə beynəlxalq turnirlərdə ayrı-ayrı hərəkətlər üzrə 27 medal (8+8+11), toplamda isə 13 (4+3+6) medal əldə etdik. Bununla yanaşı, yeniyetmələrimiz yeddi Avropa rekordu da müəyyən etdilər. Bu yarışların hər birində WADA tərəfindən atletlərimizdən dopinq test götürülüb və heç bir mənfi nəticə olmayıb.

Ötən il yeniyetmələrin və gənclərin qatıldıqları Azərbaycan birinciliklərində iştirak edənlərin 62 faizinin, böyüklərdən ibarət Azərbaycan çempionatında iştirakçıların isə 68 faizinin “Zirvə” İdman Klubunun üzvləri olduğunu vurğulayan R.Rəsulov bildirib ki, dekabrdan başlayan təlim-məşq toplanışlarında hazırda 35 ağır atlet iştirak edir. Yaxın gələcəkdə bu sayı artırmağı nəzərdə tutmuşuq. Əsas hədəfimiz bu ilin oktyabrında Argentinada keçiriləcək Yeniyetmələrin Yay Olimpiya Oyunları və noyabrda Türkmənistanda təşkil olunacaq kişilər və qadınlar arasında 2020-ci il Tokio Yay Olimpiya Oyunlarına fərdi lisenziya xarakteri daşıyan dünya çempionatıdır. Bununla yanaşı, maddi-texniki bazanın gücləndirilməsi istiqamətində idman təşkilatlarının məşq zallarını ağır atletika avadanlığı ilə təmin etmək, zallarının sayını artırmaq (artıq Sumqayıtda və Bakıda iki idman zalının son tamamlanma işləri başa çatmaq üzrədir) nəzərdə tutulub. Anti-dopinq tədbirləri çərçivəsində də məşqçilər, hakimlər və digər mütəxəssislərə mütəmadi daxili seminarların, həmçinin ilboyu beynəlxalq səviyyəli anti-dopinq seminarlarının təşkilini planlaşdırırıq.