Rosberq Bakıda Leklerin buraxdığı səhvdə “Ferrari”ni günahlandırıb
Bakı, 28 aprel, AZƏRTAC
2016-ci ilin dünya çempionu Niko Rosberq bildirib ki, Şarl Leklerin F 1 Azərbaycan Qran-Prisinin təsnifatında qəzaya uğramasının səbəbi öz pilotlarını “Medium” şinlərlə yarışa buraxan “Ferrari” komandasının səhvə yol verməsidir. Halbuki digər komandalar yürüşə “Soft” rezinlə çıxıblar. Alman pilot öz videobloqunda İtaliya komandasını tənqid edib.
AZƏRTAC xəbər verir ki, Niko Rosberq deyib: “Ferrari” özü poulu əldən verib. İnanmağım gəlmir ki, bu komanda bir-birinin ardınca öz əlverişli imkanlarını hədər yerə sərf edir. Lekler poulda olmalı idi, o, bütün uik-end boyu ən sürətli pilot olub. Mən səhvə görə onu günahlandırmıram. Bunun səbəbkarı “Ferrari”dir. Çünki təsnifatın ikinci hissəsində onlar hesab ediblər ki, hamıdan ağıllıdırlar və hər iki pilotu “Medium” şinlərdə yürüşə buraxıblar. Yaxşı ideya idi: biz yürüşə daha sərt “Pirelli” şinlərində başlamaq üçün çox sürətliyik. Mən özümə sual verirdim, məgər onlar özlərinə həddindən çox əmin deyillər? Elə həmin dəqiqədən hər şey yanlış istiqamətdə getdi. Mən evdə divanda oturub əllərimlə başımı tutmuşdum. Qışqırırdım ki, şəhər trasında bu cür nömrələr etmək olmaz. Yürüşçülərə ritm lazımdır. Nəticədə nə baş verdi? Fettel az qala divara çırpılmışdı, Lekler isə bunu etdi. Lakin bütün bunlar məntiqli idi. Hesab edirəm ki, “Ferrari”nin hərəkətləri qorxuncdur. Çünki mən də Bakıda ilk yürüşlərdə məğlubiyyətlərin əvəzini çıxan “Ferrari” görmək istəyirdim. Lakin belə olmadı və ona görə də iddia edirəm ki, “Ferrari” məğlub oldu”.
Lakin Lekler bununla razı deyil. Onun qənaətinə görə, həmin şinlərlə yaxşı nəticə əldə etmək olardı, amma düzgün tormozlama nöqtəsi seçə bilməməsi qəzaya səbəb olub. Pilot əlavə edib: “Yox, belə deyil. Əlbəttə, maşını daha sərt tərkibdə və temperaturun düşməsi şəraitində idarə etmək çətindir, lakin mən buna alışmışam və “Medium”la ilk dairə tamamilə normal idi. Mənim səhvim sadəcə daha çox şeyə nail olmaq istəyim idi. Mən “Soft”la tormozlama nöqtəsini “Medium”la istifadə etməyə çalışdım”.
Bölmənin digər xəbərləri
