Rumıniyada "Milli Ləyaqət" etirazında bir milyon nəfər iştirak edib
Buxarest, 2 mart, AZƏRTAC
Buxarestdə "Milli Ləyaqət" devizi altında kütləvi etiraz aksiyası keçirilib. Təxminən bir milyon nəfərin qatıldığı aksiyada iştirakçılar korrupsiyaya və Baş nazir Marçel Çolakun idarəetmə üsuluna qarşı çıxıblar. Etirazçılar "azad seçkilər" tələb edib və müxalifət siyasətçilərinə qarşı təqiblərin dayandırılmasını istəyiblər.
AZƏRTAC xəbər verir ki, aksiya iştirakçıları arasında prezidentliyə namizəd Kalın Corceskunun portretlərini daşıyanlar da yer alıb. O, öz mübarizəsini davam etdirəcəyini bəyan edib.
Etirazın təşkilatçısı olan "Rumıniyalıların Birləşməsi Alyansı" (AUR) partiyasının tələbləri arasında hakimiyyətin dəyişdirilməsi, siyasi islahatların həyata keçirilməsi və müxalifətə qarşı təqiblərin dayandırılması yer alır.
Qeyd edək ki, fevralın 26-da Corceskuya qarşı seçki kampaniyasının qanunsuz maliyyələşdirilməsi ilə bağlı altı ittiham irəli sürülüb. Corcesku hazırda 60 günlük səyahət qadağası altındadır. Ona qarşı istintaq, prezident seçkilərinin birinci turunun nəticələrinin ləğv edilməsindən sonra başlayıb.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
