Rusiya Ermənistandan gül idxalına məhdudiyyətlər tətbiq edə bilər
Moskva, 3 iyun, AZƏRTAC
Rusiyanın Baytarlıq və Fitosanitariya Nəzarəti üzrə Federal Xidməti (“Rosselxoznadzor”) Ermənistandan bitki mənşəli məhsulların tədarükü zamanı baş verən pozuntulardan narahatdır.
AZƏRTAC “Rosselxoznadzor”a istinadla xəbər verir ki, bu il Ermənistandan Rusiyaya kəsilmiş güllərin idxalında və bu fonda Avrasiya İqtisadi İttifaqı ölkələri üçün təhlükəli olan karantin obyektlərinin aşkarlanmasının sayında kəskin artım müşahidə olunub.
Xidmətdən verilən məlumata görə, “Rosselxoznadzor”un ərazi idarələri gül məhsullarının qərb çiçək tripsinə yoluxması ilə bağlı 13 fakt müəyyən edib. Bundan əlavə, digər növ bitki məhsullarına çoxlu sayda yoluxma halı da qeydə alınıb.
Xidmət qeyd edib ki, bu cür hallar Ermənistan tərəfindən ixrac olunan mallara nəzarət sisteminin səmərəsiz olduğunu göstərir. Bununla bağlı “Rosselxoznadzor” Ermənistanın Qida Təhlükəsizliyi Müfəttişliyinə hərtərəfli tədbirlərin görülməsi və fitosanitariya nəzarətinin gücləndirilməsi xahişi ilə rəsmi məktub göndərib. Bildirilir ki, cavab verilməsə və karantin obyektlərinin identifikasiyası davam edərsə, “Rosselxoznadzor” iyunun 16-dan etibarən üçüncü ölkələrdən Ermənistanın fitosanitariya sertifikatları ilə müşayiət olunan gül məhsullarının Rusiyaya idxalına müvəqqəti məhdudiyyətlər tətbiq edə bilər.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
