RUSİYA İLƏ GÜRCÜSTAN ARASINDASİYASİ QALMAQAL BAŞ VERMİŞDİR
AZƏRTAC-in xüsusi müxbiri xəbər verir ki, Rusiya Federasiyası ilə Gürcüstan arasında yeni qalmaqal baş vermişdir. Qalmaqala Rusiya tərəfinin MDB-in üzvü olan ölkələrin parlament sədrlərinin Sankt-Peterburqda keçiriləcək zirvə toplantısında iştirak etmək üçün Gürcüstan parlamenti nümayəndə heyəti üzvlərindən birinə - Müdafiə və təhlükəsizlik komitəsinin sədri Givi Tarqamadzeyə viza verməməsi səbəb olmuşdur. Parlamentin sədri Nino Burcanadze Gürcüstanın vəziyyətlə əlaqədar toplantıya qatılmayacağını bildirərək demişdir ki, Rusiyada gürcü siyasətçilərinin “qara siyahısı” olduğu üçün biz də oxşar ölçü götürməliyik. Siyahıya Gürcüstana viza verilməyəcək çox rusiyalının adı düşəcəkdir. Hələlik isə bu siyahıya Mitrafanov, Alksnis, Baburin və Jirinovskinin adlarının salınacağı gözlənilir.
G.Tarqamadze qonşu dövlətin bu qərarının son vaxtlar onun RF ilə bağlı etdiyi bəyanatlarla əlaqələndirmişdir. O demişdir: “Rusiya barəsində dediyim hər bir sözə görə cavabdehəm, istənilən vaxt onların hər birini təkrar etməyə hazıram. Zənnimcə, bu sözlərin heç biri Rusiya hökumətinin ünvanına təhqir deyildir. Rusiyanın bu addımını isə özümə qarşı təhqir sayıram”.
Bölmənin digər xəbərləri
