AZƏRTAC-ın İTAR-TASS agentliyindən aldığı xəbərə görə, Rusiyanın xarici işlər naziri Sergey Lavrov İraqdakı koalisiya qüvvələrinə qoşulmaq haqqında ABŞ-ın Rusiya, Fransa və Almaniya hökumətləri ilə danışıqlar apardığı barədə BMT-nin Baş katibi Kofi Annanın məlumatına münasibətini bildirərək demişdir ki, Rusiya qoşunlarının indiki şəraitdə İraqa göndərilməsi mümkün deyildir. Hələlik İraqa dair heç bir qətnamə layihəsi yoxdur. Biz hər hansı sənədin mətnini görməyincə, ona öz münasibətimizi müəyyənləşdirə bilmərik. İndi başlıca vəzifə İraqdakı xarici hərbi qüvvələri çıxarmaqdan və siyasi prosesin daha da irəliləməsi üzrə əsas əlaqələndirici funksiyaları BMT-yə verməkdən ibarətdir.
Xatırladaq ki, BMT-nin Baş katibi K.Annan mayın 3-də Nyu-Yorkda mətbuat konfransında çıxış edərək, dünya ölkələrini İraqda vəziyyətin sabitləşdirilməsində ABŞ-a kömək göstərməyə çağırmışdır. O bildirmişdir ki, mümkün qədər daha çox ölkə İraqa əsgər göndərsə, orada vəziyyətin dinciliklə nizama salınması prosesi xeyli sürətlənər. BMT-nin Baş katibi onu da demişdir ki, Birləşmiş Ştatlar Rusiyanı, Almaniya və Fransanı koalisiya qüvvələrinin tərkibinə cəlb etmək üçün onlarla əlaqələrini gücləndirmişdir.
