Rusiyanın Həştərxan vilayətində Heydər Əliyevin 100 illiyi şərəfinə tədbirlər başlayıb
Bakı, 28 fevral, AZƏRTAC
Rusiya Federasiyasının Həştərxan vilayətinin vitse-qubernatoru, qubernator administrasiyasının rəhbəri Pavel Pautovun sədrliyi ilə 2023-cü ildə Azərbaycan xalqının Ümummilli Lideri Heydər Əliyevin 100 illiyinə həsr olunmuş təntənəli tədbirlərin hazırlanması və keçirilməsi üzrə təşkilat komitəsinin iclası olub.
AZƏRTAC Həştərxan vilayətinin Xarici Əlaqələr Nazirliyinin məlumatına istinadla xəbər verir ki, Heydər Əliyev adına 11 saylı orta ümumtəhsil məktəbinin direktoru Tatyana Tixomirova iclasda çıxış edib. O bildirib ki, ilk tədbirlərdən biri rəhbərlik etdiyi təhsil müəssisəsinin foyesində təşkil olunan “Həştərxan-Bakı” adlı şəhər rəsm müsabiqəsinin iştirakçılarının sərgisidir. Yaradıcılıq müsabiqəsində iştirak edən 50-dən çox yeniyetmə rəssamın əsərləri hərarət, nur və fantaziya ilə zəngindir. Uşaqlar fırça və sulu boyanın köməyi ilə çoxmillətli Azərbaycanın və Həştərxan vilayətinin adət-ənənələrindən, Həştərxan və Bakının görməli yerlərindən söhbət açırlar. Bəzi rəsmlər Xəzəryanı qonşu ölkələrin dostluğunu tərənnüm edən plakat janrında yerinə yetirilib.
Müsabiqənin iştirakçısı, Heydər Əliyev adına 11 saylı orta ümumtəhsil məktəbinin 8-ci sinif şagirdi Sofiya Senyuta deyib: “Mən bu məktəbdə oxumağımla fəxr edirəm. Məktəbimiz Heydər Əliyev Fondu sayəsində rahat və müasir məktəbə çevrilib, burada təhsil almaq, idman və yaradıcılıqla məşğul olmaq üçün hər cür şərait yaradılıb. Azərbaycandan olan dostlarımız bizim üçün daim arzuolunan qonaqlardır”.
Xatırladaq ki, Heydər Əliyev adına 11 saylı orta ümumtəhsil məktəbinin ən yaxşı müəllim və şagirdləri dəfələrlə yay tətillərində Azərbaycanda istirahətdə olublar.
Azərbaycanın Abşeron rayonu icra hakimiyyətinin başçısı Abdin Fərzəliyev 2022-ci ildə məktəbi ziyarət edərkən koronavirus infeksiyası pandemiyası dövrünə qədər olan ənənənin - daha çox seçilən müəllimləri və şagirdləri Bakıya ekskursiya ilə mükafatlandırmaq kimi yaxşı ənənənin bərpa olunmasını təklif edib.
Bundan başqa, Həştərxan vilayətinin nümayəndə heyətinin ötən ilin dekabrında Azərbaycana səfəri zamanı Prezident İlham Əliyev dostluq münasibətlərinin möhkəmləndirilməsi məqsədilə Azərbaycan-Həştərxan birgə gənclər forumunun keçirilməsini qubernator İqor Babuşkinə təklif edib. Qarşılıqlı razılaşma əsasında forum bu ilin aprelində Bakının Abşeron rayonunda təşkil olunacaq.
Təşkilat Komitəsinin iclasında Heydər Əliyevin anadan olmasının 100 illiyinə həsr edilmiş şəhər şeir müsabiqəsinin yekunları barədə də məlumat veriblər. Müsabiqənin təşkilatçıları Həştərxan vilayətinin Təhsil və Elm Nazirliyi, “Həştərxan şəhər dairəsi” bələdiyyə qurumunun administrasiyası və Heydər Əliyev adına 11 saylı orta ümumtəhsil məktəbidir. 25 qiraətçi gənc rus və Azərbaycan klassik şairlərinin əsərlərini, eləcə də Heydər Əliyev, Rusiya və Azərbaycan, xalqlar dostluğu haqqında öz şeirlərini səsləndiriblər. Bəzi şeirlər Azərbaycan dilində ifa olunub.
V.N.Tatişşev adına Həştərxan Dövlət Universitetinin beynəlxalq fəaliyyət üzrə prorektoru Angelina Fadina Heydər Əliyevin anadan olmasının 100 illiyinin ilə bu ali məktəbdə necə qeyd olunacağı barədə məlumat verib.
Təşkilat Komitəsinin üzvü, “Azərbaycan Mədəni və İqtisadi Əməkdaşlığa Kömək Mərkəzi” Həştərxan regional ictimai birliyinin idarə heyətinin sədri Ədalət Hüseynov bu əlamətdar tarixə “Həştərxan-24” regional televiziya kanalında veriliş həsr olunması barədə təklif irəli sürüb.
Bölmənin digər xəbərləri
