RUSİYANIN MƏŞHUR OFTALMOLOQU ARKADİ NESTEROVA AZƏRBAYCANIN ŞÖHRƏT ORDENİ TƏQDİM OLUNMUŞDUR
Azərbaycan Respublikasının Prezidenti İlham Əliyevin tapşırığı ilə alimə yüksək fəxri mükafatı ölkəmizin Rusiya Federasiyasındakı fövqəladə və səlahiyyətli səfiri Ramiz Rizayev təqdim etmişdir.
Səfir bu missiyanın onun üçün çox xoş olduğunu bildirərək vurğuladı ki, təltif barədə qərar Prezident Heydər Əliyev tərəfindən qəbul edilmiş və bu barədə Fərman hələ 2003- cü il iyunun 19-da imzalanmış, o vaxt Arkadi Nesterovun yubileyində oxunmuşdur. Lakin təəssüflər olsun ki, alimə bu mükafatı təqdim etmək Heydər Əliyevə qismət olmadi.
Sonra Ramiz Rizayev Arkadi Nesterovun fəxri ordenlə təltif olunması barədə Fərmanını oxudu.
Akademik Arkadi Nesterov mərasimdə çıxış edərək, bu yüksək mükafata görə Azərbaycan Respublikasına minnətdarlığını bildirdi. Bütün həyatının ölkəmizlə bağlı olduğunu söyləyən alim dedi: “Biz Azərbaycanı hələ sovet dövründə, Heydər Əlirza oğlu respublikanın rəhbəri olanda tanıyırdıq. Yaxşı yadımdadır, o zaman Azərbaycan hər il birincilər sırasında olurdu. Bu da yaxşı yadımdadır ki, Heydər Əlirza oğlu Azərbaycan üçün ən çətin günlərdə ölkəni böhranlı vəziyyətdən tərəqqi yoluna çıxara bildi. Mən çox şadam ki, onun oğlu atasının işini davam etdirir. Biz İlham Heydər oğlunu yaxşı tanıyırıq. O, çox ağıllı və işgüzar adamdır və zənn edirəm ki, Heydər Əlirza oğlunun başladığı işi uğurla davam etdirəcəkdir” Sonra akademik Nesterovun həyat yoldaşı, mərhum Zərifə xanım Əliyevanın rəfiqəsi Alevtina Brovkina çıxış etdi. O, öz xatirələrini bölüşərək dedi: “Biz həmişə Azərbaycanın dostları olmuşuq və indi də dostlarıyıq. Orada bizim çoxlu dostumuz vardır. Əsas milliyyət yaxşı insan deməkdir. Təəssüf ki, həyat bizi müxtəlif regionlara səpələmişdir, lakin yenə də dostluğa can atırıq. Heydər Əlirza oğlu bizim üçün bu gün də sağdır. İlham Heydər oğlunu isə mən lap uşaqlığından tanıyıram. O, xoşbəxt ailədə gözəl bir insan kimi boya-başa çatmışdır. Zərifə xanım son dərəcə gözəl ana, gözəl həyat yoldaşı və hamı üçün nümunə idi”.
