İQTİSADİYYAT
“Ruukki Construction” Azərbaycana yeni “Life sandwich” panellərini ixrac etmək niyyətindədir
Bakı, 28 dekabr, AZƏRTAC
Finlandiyanın “Ruukki Construction” şirkəti dünyada yüksək keyfiyyətli polad məhsulları, innovativ xarakterli yenilikləri və tikinti sahəsində enerji səmərəliliyini qorumağa imkan verən məhsulları ilə tanınır. Şirkətin Qafqaz və Orta Asiya ölkələrindəki inkişaf strategiyasının nədən ibarət olduğu, şirkətin Azərbaycan bazarının potensialını necə dəyərləndirdiyi və digər məsələlərlə bağlı “Ruukki Construction” şirkətinin komponentlərin satışı və ixracat satışı üzrə direktoru Roman Senatorov AZƏRTAC-ın suallarını cavablandırıb. AZƏRTAC həmin müsahibəni təqdim edir.
- “Ruukki Construction” şirkəti Azərbaycan bazarının potensialını necə qiymətləndirir?
- Sənayenin inkişafı bu gün üçün Azərbaycanın sosial-iqtisadi siyasətinin əsas prioritet istiqamətlərindən biridir. Azərbaycan dövlətinin ölkəni güclü sənaye mərkəzinə çevirmək üçün apardığı siyasət nəticəsində bu bazarın potensial imkanları böyükdür. Azərbaycanda bu gün müasir texnologiyalardan və avadanlıqlardan istifadə edən orta və iri müəssisələr açılır, sənaye məhsullarının istehsalı sürətlənir, iqtisadiyyatın neft-kimya və neft-qaz sektorlarında işlər aparılır. Bütün bu göstəricilər Azərbaycan bazarını ixracatçılar və istehsalçılar üçün daha da cəlbedici edir. Deyə bilərəm ki, “Ruukki Construction” şirkəti Azərbaycan bazarının potensialını çox yüksək qiymətləndirir. Şirkət Azərbaycan bazarına çıxmaqda maraqlıdır.
- “Ruukki Construction” Qafqaz və Mərkəzi Asiya ölkələrində hansı istiqamətləri inkişaf etdirir?
- Şirkətimiz metal konstruksiyalardan hazırlanan sənaye və istehsalat binalarının layihələşdirilməsində, istehsalında böyük təcrübəyə malikdir. 2008-ci ildən etibarən şirkətin Qazaxıstanda nümayəndəliyi açılıb, şirkət Mərkəzi Asiya ölkələrinə göndərilən məhsul çeşidlərini genişləndirib. Hazırda şirkət həmin regionlara dəmir karkaslar, sendviç panelləri, hasarlar, binaların üzlənməsi üzrə sistemlər və dam örtüyü məhsullarını göndərir. Dam örtüyü üçün materiallar sexlərin, anbarların, sənaye və kənd təsərrüfatı təyinatlı anqarların tikintisində istifadə olunur. Şirkət bu istiqamətdə əməkdaşlığı davam etdirir, təklif etdiyi məhsulların çeşidlərini artırır. Qlobal iqtisadi böhrandan, iqtisadi turbulentlikdən və bazarın konyunkturasından asılı olmayaraq Qafqaz və Mərkəzi Asiya bazarındakı satışlarımız sabitdir. Bir sıra istiqamətlər üzrə, xüsusilə də “Ruukki Construction” şirkəti iri sifarişçilərlə əməkdaşlığı sahəsində müsbət töhfələrini verməkdədir. Bu il bizim şirkət həmin ölkələrdə 8 layihə həyata keçirib. Şirkətimizin ekstremal iqlim şəraitində, o cümlədən seysmik cəhətdən fəal zonalarda tikinti işlərinin aparılması üzrə geniş beynəlxalq təcrübəsi var. Buna görə də şirkətimiz Azərbaycan, Qazaxıstan, Özbəkistan və Qırğızıstandan olan sifarişçilərin etibarını qazana bilib.
- Şirkətiniz Azərbaycanda reallaşdırılan infrastruktur layihələrini necə qiymətləndirir və ölkəmizdə hansı layihələri həyata keçirib?
- Son illər ərzində Azərbaycan dinamik inkişaf edən və müasir infrastruktura malik ölkəyə çevrilib. Biz Azərbaycanın tikinti bazarı ilə fəal işləyirik. İşgüzar və dostluq münasibətlərimiz 2009-cu ildə başlayıb və bu günədək davam edir. Bizim artıq Bakıda anbarların, hasarların və anqarların tikintisi üzrə təcrübəmiz var. Bizim üçün Azərbaycanda həyata keçirdiyimiz ən maraqlı və əhəmiyyətli layihələr sırasında ölçüləri 56х140х19 metr olan yağ emalı sexinin, ölçüləri 21х60х4,2 metr olan polimer istehsalı üzrə sexin və 160х60х6 metr ölçüləri olan konserv zavodunun tikintisini qeyd etmək istəyirəm. Bu gün biz iribuynuzlu mal-qara üçün ümumi sahəsi 45 min kvadratmetrdən çox olan bina kompleksinin tikintisi üçün avadanlıq ixrac edirik. Gələn il bu böyük layihənin davam etdirilməsi üçün lazımi məhsulların çatdırılması və quraşdırılması üzrə ikinci mərhələni həyata keçirəcəyik. Şirkətin məhsulları Azərbaycanın müxtəlif regionlarını, o cümlədən Sumqayıt, İmişli, Kürdəmir və digər regionları əhatə edir. Azərbaycanla əlaqələrimizin inkişafına çox müsbət baxırıq.
- Azərbaycana ixrac etdiyiniz məhsulların çeşidini genişləndirməyi düşünürsünüzmü?
- Şirkətimiz Qafqaz və Mərkəzi Asiya ölkələrinə, o cümlədən Azərbaycana yeni “Life sandwich” panellərinin ixracını təşkil etmək niyyətindədir. Şirkət bu panellərin istehsalına 2016-cı ilin fevralından etibarən “Ruukki”nin Rusiyanın Balabanovo şəhərindəki müəssisəsində başlayıb. “Saint-Gobain” şirkəti ilə birgə hazırlanan və enerji səmərəliliyini artıran “Life sandwich” panellərinin Mərkəzi Asiya bazarında analoqu yoxdur. “Life sandwich” panelləri nazik polad listlərindən və mineral yundan hazırlanır. Panellərin enerjini qorumaq qabiliyyəti öz analoqlarından 20 faiz artıqdır ki, bu da binanı daha yüngül etməyə, bünövrəyə olan təzyiqi azaltmağa, montaj prosesini sadələşdirməyə imkan verir. Bundan başqa, sendviç panellərin tərkibinə daxil olan “ISOVER” mineral yun yüksək davamlılıq ehtiyatına malikdir.
Şirkət, həmçinin öz yeni məhsulunu - modul tipli sinkləşdirilmiş profillər əsasında istehsal edilən müvəqqəti saxlama anbarını təqdim edəcək. Konstruksiyalar həm fərdi, həm də hüquqi şəxslər üçün nəzərdə tutulub ki, bu da obyektdən öz məhsullarını saxlamaq yaxud onu başqa şəxslərə icarəyə vermək üçün imkan yaradır.
Təqdim edəcəyimiz daha yeni bir məhsul “Ruukki Emotion” fasad sistemidir. Bu, havalandırılan fasad sistemidir, dayaq konstruksiyalardan və daxili işıqlandırma sistemindən ibarətdir. Geniş çeşiddə perforasiyalardan istifadə alıcıya istədiyi dizaynı seçmək imkanı verir. Svetodiod lampalardan istifadə isə sifarişçinin istəyi ilə istənilən rəngləri əldə etməyə şərait yaradır. Buna görə də, ticarət mərkəzlərinin, ofis binalarının, stadionların xarici tamamilə başqa görkəm alacaq.
- Gələcək planlarınız nələrdir?
- Artıq 8 ildir ki, Qafqaz və Mərkəzi Asiya bazarında işləyirik və bu illər ərzində Azərbaycan, Qazaxıstan, Özbəkistan və Qırğızıstan biznesinin nümayəndələri ilə əlaqələrimizi genişləndirmişik. Biz yerli biznes nümayəndələri ilə əlaqələri genişləndirməkdə davam edəcəyik, müştərilərimizin tələbatını daha da yaxından öyrənərək onların tələblərinə uyğun gələn məhsullar təqdim edəcəyik. Biz özümüz üçün bu regionlarda yaxşı inkişaf perspektivləri görürük. Azərbaycanda kifayət qədər ciddi əməkdaşlıq etdiyimiz şirkətlər və bu ölkədə realizə etdiyimiz bir sıra böyük obyektlər var. Hazırda biz Azərbaycanda bu obyektlərlə, xüsusən də “Azərsun” şirkəti ilə əməkdaşlığı genişləndirmək niyyətindəyik. Gələcəkdə Azərbaycanda kiçik obyektlərin, eləcə də sifarişçilərin sayı artarsa, şirkət Bakıda nümayəndəliyini aça bilər.